Trunfu curtiu pal Sporting

Un Almería estráu de baxes y un Sporting cola obligación moral de dexar contenta a l'afición nel primer partíu del centenariu llegaben ayeri al Molinón empataos a puntos na clasificación.Asitiaos na parte media de la tabla, los asturianos precisaben d'un trunfu pa nun perder de vista los puestos d'arriba, y ello ye que'l Sporting salió mui echáu p'alantre y acorripió dende'l primer minutu al Almería nel so campu. Un balón al palu d'Ismael al cuartu d'hora dio'l primer avisu, anque con ser mui superior, el Sporting tampoco aprovechaba tolos güecos que taba dexando'l rival, perdiéndose dacuando en marabayos que nun llevaben a nenyuri. El dominiu local acabó por xubir al marcador cola primer parte yá p'acabar. Ismael, decisivu nel partíu d'ayer, vio la salida adelantada del porteru del Almería y picó-y la pelota per alto lo xusto pa qu'entrare, un gol guapu pero nel que quedó pa la moviola'l posible orsay del delanteru del Sporting.

El segundu tiempu foi un monólogu del Sporting, que tuvo hasta cuatro ocasiones clares de gol. Ismael, que dio col balón nel testeru de la portería, Arthuro, que demostró ser un futbolista mui elegante, y Pablo Álvarez, fulminante pela banda derecha pero que falló un remate cantáu, pudieron llevar guapamente'l marcador a un dos a cero o incluso a diferiencies más bultables. El bon xuegu del Sporting acabóse nel intre en que Neru vio la segunda mariella. El Sporting quedaba ensin central y Marcelino, a un cuartu d'hora del final, entamó a sacrificar pieces na delantera pa da-y aguante al equipu, metiendo a Carmena por Arthuro. L'Almería espurrió llinies y metió mieu. La solombra del empate medró cuando l'árbitriu Mateu la Paz, mui criticáu peles dos partes, decidió espurrir el xuegu en cinco minutos n'acabando'l tiempu reglamentariu y más cuando Luna reclamó penalti nuna acción de Dorado nel área, asuntu nel que los asistentes del árbitriu nun quixeron pronunciase. A la fin, trés puntos que meten al Sporting ente los 10 primeros y un trunfu que quedó curtiu en viendo les ocasiones.