Trunfu asturianu na lliga gallega

La Banda de Gaites de Villaviciosa-Sidra El Gaiteru algamó'l primer puestu del campeonatu internacional de la Liga Galega, imponiéndose los asturianos na xeneral dempués de les trés prebes de les que se componía esti campeonatu

La "Liga Galega de Bandes de Gaitas" qu'esti añu celebró la so XV edición, ye la competición de gaita más grande de la península. Más de 100 bandes de gaites compiten nesti campeonatu, que s'estrema en cinco divisiones distintes acordies col nivel musical de cada banda participante. Anque la mayoría de les bandes inscrites son conxuntos gallegos, yá seyan de la mesma Galicia o de cualquiera de los centros gallegos espardíos per tola península, hai tamién una participación "estranxera" qu'incluye pel momentu a una banda portuguesa y dos asturianes, que son la Banda de Gaites de Candás y la Banda de Gaites de Villaviciosa, que ta acabante de convertise na primer banda de fuera de Galicia que gana esta lliga tan prestixosa.

La banda de Maliayo, que yá ganare nel mes de payares la primer fase del campeonatu, algamó n'Aveiro, onde se celebró la segunda fase del campeonatu, una diferiencia de más de 5 puntos sobre la Banda de Gaitas Ledicia de Pontevedra, segunda clasificada na xeneral del campeonatu, quedando asina perfectamente posicionada pa facese col trunfu final, que la banda asturiana robló na preba final que se celebró esti domingu en Cabeza de Manzaneda (Ourense), onde la banda asturiana quedó per detrás de la so rival pontevedresa, anque esta nun-y pudo sacar la diferiencia que precisaba pa ponese per delantre na xeneral. La Banda Gaites Villaviciosa, que cuenta col patrociniu de Sidra El Gaitero, marcha agora pa representar a Asturies nel Festival Intercélticu de Lorient que va celebrase ente'l 5 y el 14 d'agostu, siempre baxo la dirección de Martín Poladura.