Trunfu antiglobalización

El cume de Barcelona acabó ensin que los estaos europeos llegaren a un consensu total sobre les temes que teníen enrriba de la mesa, pero la xunta de xefes d'estáu acabó cediéndo-y el protagonismu a les movilizaciones contra'l neolliberalismu y la Europa del capital. El sábadu, una manifestación na que la Delegación del Gobiernu en Cataluña contó 250.000 persones, y la organización en cerca de 500.000, estragó les cais del centru de la ciudá, pasando a la historia como la mayor demostración pública de fuerza del movimientu antiglobalización. Tres la manifestación hebo dellos altercaos, acabando la xornada con cuarenta persones deteníes, amás de rexistros policiales a autobuses y coches que salíen de la ciudá.Mientres l'ésitu de los movimientos alternativos-y comía protagonismu al cume ministerial, delles organizaciones denuncien que'l Gobiernu estatal ta faciendo tolo posible por tresmitir una imaxe criminalizada del mesmu. En concreto, dende'l portal Nodo 50, que-yos da encontu na rede a cerca de 500 organizaciones sociales y polítiques y que sirve d'estragal a bien del movimientu antiglobalización, acusen al Ministeriu d'Interior de que Policia Nacional y Guardia Civil anden mangoniando nel so web pa pañar datos y de que dempués esparden informaciones engañoses y criminalizadores colo qu'atopen ellí. Claro que colo que nun contaben les fuerces de seguridá yera con que-yos pillaren les direcciones y se convirtieren en cazadores cazaos. Nodo50 tien puestu un interesantísimu especial sobre la tema.