Trevín anuncia la restauración del monasteriu de San Antolín de Bedón

La Delegación de Gobiernu estatal n’Asturies va aniciar contautos cola Conseyería de Cultura y Deporte pa clarificar la titularidá del monasteriu de San Antolín de Bedón. Antonio Trevín comprometióse a restaurar esti edificiu llaniscu.
 
El primer pasu que dio’l delegáu del Gobiernu estatal foi nomar a José Luis Villaverde pa qu’anicie los trámites pertinentes xunto colos téunicos de la conseyería. “L’oxetivu ye fixar los trabayos previos, cuestión imprescindible pa clarificar la titularidá del monasteriu de San Antolín de Bedón, y establecer, con posterioridá, les intervenciones necesaries pa la restauración adecuada del templu”, señalen dende la Delegación.
 
Esta anuncia produzse un día depués de que Trevín visitara l’oriente asturianu que tán bien conoz. Nel trescursu d’esti viaxe, el Conceyu de Llanes pidió la collaboración del Gobiernu estatal pa resolver la situación de deterioru que sufre’l templu, a lo que’l delegáu respondió col so compromisu d’ayudar al Consistoriu a aclarar a quién pertenez cada elementu y ver qué pue facese pa meyorar y conservar el monasteriu.
 
El templu de San Antolín de Bedón data del sieglu XII, mentes que’l restu d’edificaciones que completen el conxuntu son posteriores. Asitiáu ente Bricia y Naves, anguañu presenta un aspeutu d’abandonu, con vexetación peles fachaes. Un grupu de vecinos recoyera nes selmanes últimes más de quinientes firmes pa reclamar la restauración del monasteriu, que yá tuvo una intervención nel 1999.