Treslladada a Getafe una de les firíes del españíu de Xixón

La muyer de 37 años, Mercedes Troitiño López, firida de gravedá nuna esplosión nel so pisu de Xixón, foi treslladáda la pasada nueche a la unidá de quemaos del Hospital de Getafe (Madrid), según confirmaron a Europa Press fontes hospitalaries.

La muyer presenta quemadures de primer y segundu grau en más del 50 por cientu del so cuerpu, polo que se decidió'l so treslláu al centru madrilanu tres recibir atención de primeres nel Hospital Central d'Asturies (HUCA). Fontes hospitalaries esplicaron, sicasí, que la decisión de treslladar a la paciente demientres la nueche d'ayeri nun se produxo por un agravamientu del so estáu.

Mercedes Troitiño López alcontrábase nel baxu derecha del númberu 17 de la cai Nalón, del barriu de Contrueces, cuando se produxo hacia les 16.30 hores d'ayeri la esplosión. La muyer sufrió quemadures nel tórax y les estremidaes. También resultaron con lesiones otres cuatro persones, ente elles la fía de la principal afectada, de nueves años, que taba xugando nel parque nel momentu del sucesu y que sufrió firíes nun brazu.

De la mesma manera, otra muyer que paseaba pela zona sufrió lesiones poles que tuvieron qu'ingresala nel Hospital de Cabueñes (Xixón), onde van intervenila. Los otros dos firíos, de poca gravedá, fueron dos vecinos del inmueble siniestráu.

La Policía Xudicial investiga les causes del siniestru tres descartar HC Enerxía que pudiera debese a una fuga na instalación de la vivienda y de los servicios comunitarios. La Policía sospecha que la esplosión pudo debese a un "fechu accidental" o una acumulación de gas.