Trés trabayadores de Vesuvius entamen un zarru na catedral d’Uviéu

|
Camiseta Vesuvius

Al igual que fixeron los de Duro Felguera n’avientu del 1996, los trabayadores de Vesuvius comenzaron un zarru na catedral d’Uviéu pa defender los sos puestos de trabayu. Na tarde del miércoles, col preste del Arzobispáu, trés emplegaos dieron el pasu.

Naquella ocasión, hai casi 23 años, cuatro trabayadores recluyéronse nel templu per 318 díes como midida pa visibilizar un conflictu que yá tomara les cais, hasta resolver la situación. La intención de los trés de Vesuvius, de los que nun se dieron datos personales, ye permanecer nel edificiu hasta que la so problemática algame una solución: la intención de la multinacional británica de parar la producción nes plantes de Llangréu y Miranda de Ebro y dexar na cai a 111 y 17 persones, de manera respeutiva.

La solidaridá nun tardó n’apaecer y numberosos ciudadanos acudieron a la plaza de la Catedral a sofitar a los trés emplegaos y al restu de compañeros que los acompañaron hasta Uviéu. Ente ellos #LluchandoPolaSoberanía, qu’acudió con una pancarta col lema ‘Asturies entera con vos’ y la etiqueta #VesuviusNunPieslla.

Fin del plazu de negociación del ERE

El llunes final’l plazu de negociación del ERE, cola empresa inamovible na so postura. Dende les instituciones soliciten a Vesuvius una ampliación de dichu plazu, mientres que trabayadores y responsables de la multinacional van aconceyer güei nel Serviciu Asturianu de Solución Estraxudicial de Conflictos (SASEC) cola intención d’averar postures.

Mentes, esta tarde ta convocada una concentración d'apoyu a los trabayadores na plaza de la catedral a les 19 hores.

Contador Estadistiques