Trés grupos ecoloxistes ponen un pleitu pola estación de "Fuentes de Invierno"

El "Colectivo Montañero por la Defensa de los Picos d'Europa", la" Asociación Asturiana d'Amigos de la Naturaleza" (ANA) y la "Coordinadora Ecoloxista d'Asturies" presentaron una denuncia conxunta énte la Fiscalía de Mediu Ambiente del Tribunal Superior de Xusticia d'Asturies.

La denuncia tiénse en que, según los trés grupos ecoloxistes, la construcción del accesu a la estación, la primer obra dientro de la construcción del parque, ta faciéndose en suelu que ta catalogao como "non urbanizable" cosa que los grupos yá denunciaren nes alegaciones que presentaron al proyectu y que quedaron ensin rempuesta, en cuantes que'l conceyu ayerán dio de pasu les obres ensin que se resolvieren primero les alegaciones que presentaren

Los grupos ecoloxistes argumenten que les normes subsidiaries urbanístiques d'Ayer "tan entovía en vigor y especifiquen que, no tocante a suelu non urbanizable ha aplicase lo que diz na normativa urbanística asturiana pal mediu rural". Estes normes apauten la torga de «toa actividá, edificación o cambéu d'usu que pueda implicar la tresformación de la naturaleza". Ello afecta tamién a "edificaciones o instalaciones d'interés social o utilidá público, construcciones o instalaciones venceyaes a la execución, construcción o edificación" aspectu que sorrayen los ecoloxistes porque dempués de la obra del camín d'accesu tien de venir la de la base d'operaciones de la estación. Los ecoloxistes ven mal que l'entamu de la obra nun pasare pel trámite de l'aprobación na CUOTA (Comisión d'Urbanismu y Ordenación del Territoriu del Principáu d'Asturies) y per un plazu d'información pública.