Trés discos faen estoyu de la carrera de "Fe de Ratas"

El grupu de rock de la parte d'Avilés presentó'l so compilatoriu "imprescindibles". Tres CD y un DVD con un directu del grupu colos que Fe de Ratas quier marcar un puntu y aparte na so carrera,qu'entra nuna etapa nueva cola llegada del guitarrista Rafa Kas.

Los trés CD y el DVD que se presentaron esta selmana na sede de la SGAE, asoleyaos pola casa de discos "Santo Grial" cubren tola carrera d'esti grupu asturianu dende 1999 hasta agora, alcontrándose nuna mesma caxa los trés trabayos d'estudiu del grupu ("Tu tranquilo y a lo tuyo" "A esta civilización" y "Miseria frente a miseria") más ún DVD que recueye los momentos más interesantes del directu de la banda.

Los integrantes de "Fe de Ratas" presentaron esti compilatoriu como un trabayu col que quieren marcar un reblagu na so carrera, qu'entra nuna fase nueva cola llegada al grupu del guitarrista Rafa Kas y del batería Paulino Fernández. Con ellos, Fe de Ratas quier entrar nuna etapa distinta, qu'ellos mesmos definieron como "más profesional, sólida y más fecha". Ello va conocese nel nuevu discu d'estudiu del grupu,que saldrá hacia febreru del 2005 y que van dir a grabar a Cadiz pal mes qu'entra.

Rafa Kas, la entrada más sonada na formación de Fe de Ratas, ye ún de los guitarristes de rock de mayor calidá del panorama asturianu. Conocíu poles sos actuaciones con grupos más o menos estables (Tuscany Valley Experience, Nenucos) y por participar como músicu "de repartu" con grupos tan alloñaos del so estilu como "La Unión" o "Toreros muertos" Rafa Kas congracióse de poder volver agora a "los mis oríxenes" como músicu nuna banda de rock, y dio anuncia de que con elli, el grupu diba entornar pa contra un soníu más "hard rock". Pesimista sobre'l futuru y presente del rock, el guitarrista de Xixón reconoció que "El rock morrió pa los grandes circuitos comerciales y namás queda sobrevivir en circuitos alternativos y buscar medios propios de subsistencia".