Trece empreses asturianes viaxaron con Asturex a Marruecos pa participar nuna misión comercial

Una delegación de trece empreses asturianes participaron a finales de marzu nuna misión comercial en Marruecos entamada por Asturex. L’oxetivu de la visita ye consolidar les rellaciones esistentes y abrir mercáu nel país norafricanu.
 
Les firmes asturianes desplazaes a Marruecos foron Adaro Tecnología, APTA, Atox Sistemas de Almacenaje, Benito Sistemas de Carpintería, Bodegas Fernández, Dimelsa, Hicasa, Internacional Alonso, Joluvi, Maprinsa, Puertas Acorazadas Asturmadi, Sidercal Minerales y Roces Carbones. La visita llega tres la entrada en vigor del tratáu de llibre comerciu ente’l país norafricanu y la Xunión Europea pol que tolos productos industriales europeos tienen arancel cero pa la so entrada en Marruecos, al igual qu’asocede colos marroquinos nos estaos miembros. Dende’l Gobiernu d’Asturies recuerden tamién la posibilidá d’esportar a Estaos Xuníos mercancíes del país al traviés de montaxes o acabaos en Marruecos gracies a un alcuerdu similar colos norteamericanos.
 
Ente otros negocios fechos ente’l 26 y el 30 de marzu, l’Executivu destaca la venta fecha por Sidercal Minerales de 1.800 tonelaes de los sos fabricaos pala fundición d’aceros. Pa esti 2012, Asturex tien en marcha delles iniciatives pa sofitar a empreses asturianes a intoducise nos mercaos siguientes: Brasil, Colombia, Perú, Estaos Xuníos, México, Panamá, China, Rusia, Polonia, Benelux, Italia, los países nórdicos, Arxelia y Emiratos Árabes.