Trece conceyales de Siero entamen una moción de censura contra l’alcalde, Guillermo Martínez

Los seis conceyales de FAC en Siero, col apoyu de cuatro de los seis del PP, los dos de la Plataforma Vecinal de La Fresneda y el de Conceyu, entamaron una moción de censura contra l’alcalde. Martínez amosó la so sorpresa por esta aición.
 
El PSOE gobernaba nel conceyu depués de que FAC y PP nun llegaren a un alcuerdu, dalgo que favoreció les crítiques del partíu asturianu hacia los populares. N'agostu d'esti añu, l'ex alcalde de Siero y presidente del PP llocal, José Antonio Noval, anunció la so baxa del partíu.
 
Guillermo Martínez esplicó que la moción interpunxéronla a les 11.45 hores 13 de los 25 conceyales que componen el Plenu, "ensin argumentar y ensin esplicar". "Pidímos-y encarecidamente a esos 13 conceyales qu'espliquen qué motivos hai pa la eleición d'un alcalde de Foro que nun vieron nel mes de xunu y qué elementos de xestión d'estos cuatro meses motivaron la moción", añadió l’alcalde actual.
 
Hai que destacar que la direición del PP asturianu anunció güei que la decisión de cuatro de los sos ediles “nun ta apoyada pol partíu” y que va tomar "les midíes oportunes" conforme a los Estatutos de la organización ante la situación xenerada. Afirmen que la decisión de los conceyales del PP de sofitar la moción ye "a títulu personal".
 
Too apunta a que, de salir alantre la moción, l'alcaldía vaya a pasar a manes del partíu Foro Asturias, llideráu por Francisco Álvarez-Cascos, presidente d’Asturies.