Trebolgu lleva'l sabadu'l meyor folk a Uviéu

L'Asociación Cultural Trebolgu entama mañana sábadu los sos tradicionales alcuentros nel Parque del Oeste d'Uviéu. Esta cita, que lleva celebrándose dende l'añu 2000, cuenta pa la edición d'anguaño col grupu de pandereteres Dulcamara y les actuaciones de los grupos folk Corquiéu y Skanda pola parte asturiana, más los cántabros Manuel Luna y Brena La Música.

El programa pa esta edición va entamar a les 12 hores del sábadu cola animación de les bandines peles cais de L'Argañosa, tando previsto yá pela tarde qu'entame sobre les 20 hores l'Alcuentru de Bandes de Gaites, nel que van participar les bandes Esbardu d'Avilés y Llariegu de Sariegu, anque'l puntu fuerte de la xornada va ser a les 22 hores, cola actuación de les pandereteres de Dulcamara y los cántabros Manuel Luna y Brena La Música, quedando pa detrás los riosellanos Corquiéu, que van presentar el so nueu discu Salia, acabante salir al mercáu, y los mierenses Skanda, col trabayu Sangre d'Ochobre.

Fuera del programa musical y folclóricu, los miembros de Trebolgu tienen previsto desplazase al estadiu Carlos Tartiere, que ta atiestando col parque au se celebra l'alcuentru, y onde l'Uviéu xuega contra l'Ávila'l partíu que lu pue ascender a 2ªB, col oxetivu de dar l'apoyu de Trebolgu al equipu local.
Ver equí'l cartel de los alcuentros