Trabe va participar n’Aragón nuna mesa redonda sobre la edición en llingües minorizaes

Calamocha entama estos díes el II Salón Profesional del Libro ENDEI Norte, cola participación de 32 editoriales. Ente elles ta Ediciones Trabe, convidada a participar nuna mesa redonda entitulada ‘Editar en otras lenguas’ que va moderar el direutor xeneral de Política Lingüística del Gobiernu d'Aragón, José Ignacio López Susín.

Esther Prieto va ser la encargada de representar a la editorial uvieína, que trabaya mayormente n’asturianu, nesti eventu que se desendolca nel parque Rafael Angulo d’esta población asitiada en Teruel. Xunto a ella Mercè Pérez, de la valenciana Sembra Llibres, y Unai Pascual, de la vasca Denonartean, que tamién van dar la so esperiencia sobre la edición en llingües minorizaes el sábadu dende les 18 hores.

Ye ún de los munchos eventos programaos pa estos díes nesti salón, con orixe nel Encuentro Nacional de Editories Independientes (ENDEI), qu’entama l’Ayuntamiento de Calamocha y el Instituto de Estudios Turolenses, dependiente de la Diputación de Teruel. Editoriales, escritores, distribuidores, ilustradores y públicu van tar en contautu per trés xornaes pa promocionar la llecturar y descubrir y compartir esperiencies, idees y proyeutos.

Na imaxe, Diego Piñeiro, delegáu d'Educación, Cultura y Turismu de la Diputación de Teruel, y María Teresa Beltrán, conceyala de Cultura de Calamocha, na presentación del salón. Semeya propiedá del Gobierno de Aragón.