Trabe recupera’l so premiu de novela n’asturianu

Ediciones Trabe ta acabante de facer pública la convocatoria del Premiu de Narraciones Trabe pa obres en llingua asturiana. Esti premiu, que s'estrenó nel añu 1992 celebró la so última edición nel 1996. Los ganadores d'aquelles cuatro ediciones del certame foron Miguel Rojo cola novela Histories d'un seductor, (Memories d'un babayu) Santi F. Ochoa cola novela Los párpagos de Buda Pablo Antón Marín Estrada cola colección de cuentos Esa lluz que naide nun mata y Berta Piñán co volume de cuentos La tierra entero.

Nueve años dempués de la última edición, la editorial que dirixe Antón García recupera'l concursu, que sigue abiertu a narraciones en formatu de novela o volumes de cuentos y xube la dotación económica hasta los 3.000 euros, a los que s'amiesta la seguridá de que la obra va publicala Ediciones Trabe, lo que fai del certame particular d'esta editorial el segundu meyor dotáu pa lliteratura n'asturianu tres del premiu de novela Xosefa de Xovellanos.

Con un mínimu de sesenta páxines escrites y cola lóxica condición de qu'han de ser trabayos inéditos y ensin premiar n'otros concursos, el plazu de presentación pa esti interesante concursu pieslla'l 30 de payares de 2005. Los orixinales hai que los mandar a Ediciones Trabe, c/Padre Buenaventura de Paredes, 4, 33001 Uviéu, en mano o per corréu.