Día del Llibru Asturianu

Trabe anima la desescalada cola espublización de cuatro llibros n’asturianu y gallego-asturiano

|
Premios Asturies Moza 2019 Trabe

Ediciones Trabe ta acabante d’asoleyar cinco llibros, cuatro n’asturianu, ún en gallego-asturianu y otru en castellanu. Trés correspuenden a les obres ganadores de los Premios Asturies Moza nes estayes de Poesía, Narrativa y Testos Teatrales del 2019, mentes qu’una cuarta ye’l Premiu Fernán-Coronas del 2018.

‘Superpoderes’, de Miguel Rodríguez Monteavaro, resultó merecedor del Asturies Moza de Poesía. Esti poemariu ye “un llibru que desafía les estructures tradicionales y que fai un llamamientu colectivu a sobrevivir sacando’l máximu partíu a la época que nos toca habitar”, apunten dende Trabe.

Nicolás Bardió, mentes, llevó’l de Narrativa con ‘La colomina 36’, una ucronía que naz del xuegu de rol ‘Depués d’ochobre’. El personaxe principal ye Fabián un espía del KGB que tien como destín de la so primer misión una colomina deprimente d’un Mieres soviéticu na década de los 70.

El tríu de ganadores completólu Cristian David López con ‘Basta con tener ganas’, na estaya de Testos Teatrales. Los trés llibros pase a formar parte de la coleición ‘Texu’ de Trabe, al igual que los gallardonaos n’ediciones anteriores.

Más versos

Otra obra premiada, nesti casu col Fernán-Coronas qu’entama la Sociedá Popular La Regalina, de Cadavéu, correspondiente al añu 2018, tamién va poder disfrutase esta desescalada. Ye ‘Reflexones d’un cuerpu opacu’ de Solinca Turbón, segundu poemariu de la llangreana tres ‘Lliteratura interna’, con versos más llargos, llibres de rima y de cómputu que son “el correllatu esactu d’un yo que va mandándose de la esperiencia, del ‘ser discordante’ qu’escribe”.

L’idioma del occidente del país tamién va contar con una espublización nueva. Trátase de ‘Na palma da túa mao’, el primer poemariu en gallego-asturiano de Conchita Álvarez Lebredo, “escrito con llingua pulcra y xinxella en versos curtios que forman poemas de xeito, as máis das veces, narrativo y de llargor considerable”.

Contador Estadistiques