"Trabayando con trebeyos" esposición pa escolinos sobre cultura y llingua asturianes

La Oficina Municipal de la Llingua de Xixón tien abierta nel Antiguu Institutu Xovellanos y hasta'l 15 de febreru la esposición "Trabayar con trebeyos" cola que quier averar a los escolinos del conceyu a la conocencia de dellos aspectos de la cultura y les tradiciones d'Asturies.

Los conteníos que se-yos espliquen a los neños na esposición faen referencia a estremaes actividaes de la sociedá tradicional del país. Asina, al traviés d'una visita guiada esplíquense-yos a los rapacinos actividaes humanes esenciales a lo llargo de los sieglos pa los nuesos güelos, casu de la Llana y el Llinu, los llabores de la ferrería, los molinos, la ellaboración del pan o la romería. A partir d'estes cinco estayes principales va esbillándose toa una riestra de temes llaterales como la tosquila, el filáu y los sos preseos, los xastres o alfayates; la sema de la escanda y el trigu, la maquila; les ferramientes que salíen de les ferreríes y otros munchos aspectos.

Ente los recursos de la esposición hai una colección de moñeques y moñecos vistíos colos traxes tradicionales de les distintes fasteres d'Asturies, y ye que los organizadores de l'amuesa aseguren qu'esta nun ye namás pa que los neños miren y escuchen, y que lo que se pretende ye que xueguen, pa lo que se faen delles actividaes complementaries a la visita rellacionaos cola llingua y cultura asturianes.