Trabayadores de la normalización llingüística denuncien que la Conseyería nun cumple los sos compromisos

Responsables d'oficines de normalización llingüística del país y trabayadores de l'alministración rellacionaos cola normalización del asturianu presentaron esti sábadu l'Asociación de Trabayadores de la Normalización Llingüística (ATNL), una plataforma dende la que quieren denunciar la situación de precariedá llaboral que carecen los servicios de normalización social del asturianu. Mui críticos cola Conseyería de Cultura, los representantes de l'ATNL denuncien que de los diez servicios locales qu'esisten na teoría, en realidá namás funcionen 6 y que la Conseyera de Cultura nun-yos respondió a les trés cartes que-y lleven mandaes dende xunu del 2005.

L'Asociación, na que tan presentes los responsables de los servicios de Normalización de Xixón, L.lena, Comarca de la Sidra, Cabu Peñes, Siero y Cangas del Narcea, declaró na so presentación que se sentía defraudada pola actitú de la Conseyería, de la que dixeron que cuando nel añu 2002 presentó públicamente na Selmana de les Lletres la Rede de Normalización Llingüística nos Conceyos, "amosó una compromisu claru cola dignificación y normalización social de la llingua asturiana".

Sicasí, los miembros de l'ATNL declararon que "pasaron yá tres años y hai un incumplimientu d'esi compromisu de normalizar la llingua asturiana por parte de la Conseyería de Cultura" un incumplimientu que, amestáu a les difíciles condiciones de trabayu que carecen, "llevó a la creación de l'Asociación de Trabayadores de la Normalización Llingüística". L'ATNL denuncia que "la normalización de la llingua asturiana ta desenvolviéndose en munchos casos nunes condiciones que nun son les meyores nin les más eficaces" nomando ente elles la "precariedá llaboral, la falta de voluntá política, l'arrequexamientu nel organigrama municipal, la inestabilidá y la falta de recursos".

Los miembros de l'ATNL denuncien que, anque oficialmente hai creaos diez servicios de normalización en conceyos y mancomunidaes "la situación a 4 de febreru ye que solo tán n'activo seis".

Los trabayadores de la normalización faen un doble llamáu a les alministraciones local y asturiana pa que faigan real el so apueste pola normalización. Nel casu de los conceyos dende l'ATNL camienten qu'estos han garantizar el llabor de los sos servicios de normalización "con unes midíes de mínimos" ente les que taríen "asegurar l'allugamientu afechiscu del serviciu nel organigrama del Conceyu; el garantizar el plenu rindimientu del Serviciu; facer de la llingua asturiana una cuestión tresversal en tolos ámbitos del conceyu y desendolcar aiciones concretes que vaigan normalizando socialmente la llingua asturiana".

No tocante a l'alministración autonómica, l'ATNL píde-y que trate la cuestión de la normalización cola mesma seriedá qu'otres materies y afirma que "El Gobiernu del Principáu d'Asturies ye quien tien la competencia en materia de normalización llingüística, polo tanto ye él quien tien d'asegurar que la normalización llingüística se tresllade a los conceyos asturianos, como lo fai con otru tipu de servicios".

Sicasí, los miembros de l'ATNL camienten que "la llinia que la Conseyería vien marcando en materia de normalización nun ye eficaz nin garantiza que los servicios tengan continuidá, yá qu'hai cuatro servicios que pel momentu siguen zarraos, lo qu'amuesa una dexadez que nos abulta daveres irresponsable". Los responsables de la organización dicen que lleven dende'l branu del 2005 esperando pola rempuesta de la Conseyera de Cultura, Ana Rosa Migoya, a les trés cartes que-y unviaron.

Inxerta nel Conceyu Abiertu pola Oficialidá, l'ATNL pidió tamién que se reconociere la oficialidá del asturianu nel estatutu d'autonomía.