TPA y TVG repiten la esperiencia d’emisión conxunta en Navidá cola fusión de ‘Babel’ y ‘Luar’

Una cuota de pantalla del 15,7 por cientu rexistró la Navidá pasada ‘Inimitables: Benvidos / Bienllegaos’, la primer emisión conxunta de la TPA y la TVG. La bona esperiencia lleva a les dos canales a repetir esti añu cola participación del asturianu ‘Babel’ nel históricu programa gallegu ‘Luar’, onde van actuar artistes de los dos países.

Sonia Fidalgo, que va tar nesta ocasión acompañada de Marisina, va presentar ‘Luar & Babel: Benvidos / Bienllegaos’ xunto con Xosé Ramón Gayoso, especial que va tener l’asturianu y el gallegu como llingües vehiculares. L’humor y la música van ser el filu conductor del programa, que van emitir TPA y TVG al empar mañana a les 22.30 hores.

Per parte asturiana van actuar Hevia, Joaquín Pixan, el grupu Tekila, Xeitu con Ambás y Ramsés Ilesias, y el Coru Minero de Turón. Mentes, la representación gallega va correr a cargu de la orquesta Los Satélites, Christian Escuredo, Susana Seivane y Adaíl.

Programación de Nuechebona

TPA tamién tien preparáu un programa especial pa esta nueche. Trátase de ‘Esta Nuechebona brinda con Marisina’, na que’l personaxe interpretáu por Pedro Durán va compartir so cena, a la que convidó a “un pilotu de Fórmula 1, una actriz de Candás y un cantante de Mieres”, que podríen dir o non, con tolos asturianos.

La celebración ta convocada pa les 21.15 hores y enantes de sacar la comida van pasar a saludar a Marisina, al so Sandokán y a la so suegra los sos collacios Vicente Díaz, Anabel Santiago, Beatriz del Grupu Beatriz, Alberto Rodríguez, Laude Martínez, Iván Cano, Nerea Vázquez, la orquesta Waikas, la orquesta Versión Original, Samba y La Marquesina y el showman Charly Teibo. Tres la mesma, TPA va emitir otru especial de ‘La batalla d’OP Siglo XXI’.

Na semeya, Gayoso y Fidalgo, detrás, baillen nuna de les actuaciones del programa conxuntu.