TPA va emitir los dos duelos asturianos de Segunda B en llingua asturiana

Esti domingu hai un doble duelu ente los equipos asturianos de Segunda B y la TPA va emitir en llingua asturiana los dos partíos en direuto. Trátase del derbi de filiales ente’l Sporting B y el Vetusta, pela mañana, y el choque ente l’UP Langreo y el Marino, de tarde.

Al meudía ta programáu’l comienzu del partíu ente les promeses de los dos principales equipos del fútbol del país, enfrentamientu que se tresllada a El Molinón. Fernando García de Dios va encargase de narrar los ataques del segundu equipu roxiblancu, mentes que Miguel Fernandi va facer lo propio cuando los d’El Requexón tengan el balón.

De tarde, a les 17 hores, los siguidores del fútbol van poder disfrutar d’un partíu nuevu en llingua asturiana, nesti casu’l duelu ente l’Unión y el Marino, que se va xugar en Ganzábal. TPA llegó a un alcuerdu con Footers, plataforma que tien los derechos del club llangreanu, y va poder emitir en direuto esti partíu que va contar colos comentarios de García de Dios.