TPA estrena la versión asturiana de 'Inception'

'Orixe' va emitise a les 22.05 hores coincidiendo col Día de la Nación Asturiana.

Gonzali Producciones, baxo la direición d'Iyán González, encargóse del doblaxe al asturianu d'esta película de ciencia-ficción dirixida nel 2010 Christopher Nolan y protagonizada por Leonardo DiCaprio. El repartu d'actores que participen nesti proyeutu ta formáu por Félix Corcuera (DiCaprio), Lorena Armengol (Ellen Page), Valentina Maile (Marion Cotillar), Pablo Moro (Joseph Gordon-Levitt), Carlos Novoa (Tom Hardy), Jorge F. Álvarez (Ken Watanabe), Pachu Viña (Cilian Murphy), José Santa Clara (Michael Caine), Francisco Otero (Tom Berenger), Herminio García-Riaño (Dileep Rao), José Manuel Monteserín (Pete Postlethwaite), José García Fernández (Ryan Hayward), Alfonso Jiménez (Lukas Haas), Eduardo Zulaiba (Michael Gaston), Bruno Petrelli, Raquel Menor, Sara Fernández, Estefanía Lada, María Luisa Fernández, María Guibert y Hugo García. La mayor parte d'ellos pertenecen a la Escuela de Doblaxe d'Asturies.

La historia céntrase en Dom Cobb (DiCaprio), "un lladrón especialista nel arte de la estraición de secretos mientres l'estáu de suañu, cuando la mente ye más vulnerable. La so habilidá conviértelu nuna acobiciada referencia del espionaxe corporativu, pero coles mesmes fai d'él un fuxitivu internacional y va llevalu a perder tolo qu'ama. Un trabayu últimu podría devolve-y la so vida si, en llugar de robar una idea, llogra xunto col so equipu enllantar una, anque tendrá d'enfrentase a un peligrosu enemigu que paez predicir cada unu de los sos movimientos", espliquen dende Gonzali Producciones. La estrena de 'Orixe (Inception)' va ser a les 22.05 hores, tres el concursu 'El Picu'. Darréu va emitise un programa nuevu de 'Pieces'.