TPA dedica un espaciu a la obra y la historia de les escritores n'asturianu y gallego-asturiano

‘Elles, muyeres na lliteratura asturiana’ ye’l programa documental que va estrenar esti miércoles TPA n’horariu nocherniegu. Esti espaciu divulgativu compuestu de trés espisodios ta pensáu “pa dar a conocer a les muyeres escritores n’asturianu y gallego-asturiano”.

La periodista Sonia Avellaneda encargase de conducir esta serie producida por Cuatro Gotes baxo la direición d’Inaciu Galán. Más de mediu centenar d’investigadores y escritores participen col so testimoniu nesti documental, contando les carauterístiques de cada autora, la novedá y la importancia de la so obra.

Encadarmada n’orde cronóloxicu, el capítulu de mañana, programáu pa les 23.35 hores, va dedicase a la lliteratura oral y a les pioneres, escritores de los sieglos XVIII y XIX como Xosefa Xovellanos, Taresa Cónsul, Enriqueta González Rubín y Matilde de Soigne. “Destácase en cada autora lo más importante del so papel. En Xovellanos la importancia de la so obra, como primer muyer qu’escribe n’asturianu de la que mos lleguen noticies, asina como la misteriosa hestoria d’Enriqueta González Rubín, qu’inaugura la novela n’asturianu y de la que nun llegó nenguna semeya, asina como’l misteriu de la desapaición del so llibru ‘El viaxe del tíu Pacho el Sordu a Uviedo’, redescubiertu en 2008”, espliquen dende Cuatro Gotes.

Avellaneda visita los llugares nos que vivieron y crearon estes escritores y espacios rellacionaos com elles, introduciendo la cuestión como si d’una investigación se tratara y como un viaxe alredor d’Asturies, con actrices dramatizando les sos vivencies. La productora xixonesa apoyóse nel asesoramientu de les autores y estudioses de la lliteratura asturiana Marta Mori, profesora de la Universidá d’Uviéu; Esther Prieto, editora; y María Esther García López, presidenta de l’Asociación d’Escritores d’Asturies pal desendolcu d’esta serie documental que pretende presentar a la sociedá asturiana’l papel tan importante xugáu por estes muyeres na nuesa lliteratura, desconocíu pa un sector importante de la población.