Torre diz que tien un ‘plan B’ sobre Venturo XXI

El conseyeru d'Industria y Empléu del Principáu d'Asturies, Graciano Torre, afirmó güei que tien un ‘plan b, del que nun ufiertó detalle dalgún, pa que siga l'actividá en Venturo XXI.

Esto sería nel casu de que non fructifiquen les negociaciones pa que nenguna de les cuatro compañíes, coles que se caltienen conversaciones, terminen faciéndose cargu de la empresa.
  
Na Comisión d'Industria y Empléu de la Xunta Xeneral del Principáu d'Asturies (JGPA) aldericóse güei la situación de la empresa, somorguiada nun concursu d'acreedores. Ta participada pola Sociedá Rexonal de Promoción (21%), los empresarios Manuel y José Coronado (51%), Sadim Inversiones (21%) y Sodeco (7%).
  
D'esta forma, si nun s'atopara comprador pa Venturo XXI nin nel procesu concursal, nin tres una posible fase de disolución, dao que la empresa atropa una delda d'unos cinco millones, sería cuando l'Alministración asturiana recurriría al mentáu 'plan b'. Tampoco nos pasiellos de la Xunta quixo esclariar, a entrugues de los periodistes, en qué consistiría'l mentáu plan.
  
Primeramente, na Comisión, Torre que la escesiva "cobertoria mediática" de lo socedío con esta empresa resultaron "bien perxudiciales".
  
Esi informe ye provisional, y ta pendiente d'aprobase'l definitivu, previu al posible conveniu, entá pendiente del resolvimientu de dos incidencies concursales, según esplicó Torre. L'informe, añedió, tamién señala que la xestión de los miembros del conseyu d'alministración foi llegal y acuciosa  y que'l problema ye que la empresa llogró perdes dende'l principiu. Ello ye que señala que'l principal problema ye la falta de contratación.
  
Lo que sí tien claro Torre ye que, en casu de qu'una empresa quixera mercar Venturo XXI, ye que nun sería del sector  de la cartografía. Tampoco caltendría los niveles d'empléu que tenía la compañía. "Nun soi tan iluso de pensar que va ser una empresa cartográfica cuando'l mercáu fundióse", dixo.
  
El diputáu de Bloque por Asturies, Roberto Colunga, dixo que la lliquidación de Venturo XXI confirma'l fracasu" de la política de reestructuración industrial del Principáu, que recurre a empresarios "cazarrecompensas". Esixó a Torre una solución pa recolocar a el trabayadores.

Confianza na cartografía
El voceru del comité d'empresa de Venturo XXI, Miguel Fernández, señaló que confía en que la empresa que finalmente adquiera la compañía, anguaño somorguiada nun procesu concursal, tea rellacionada cola cartografía "pa siguir teniendo opciones de trabayar ehí".
  
Fernández tuvo siguiendo la comisión d'Industria y Emplego sobre Venturo XXI na Xunta Xeneral del Principáu. A pesar de que'l conseyeru d'Industria, Graciano Torre, dixo na so comparecencia que'l mercáu de la cartografía taba fundíu, Fernández señaló que si se pretendiera instalar una compañía d'otru sector dafechu distintu, por casu del metal, sería "una tomadura de pelo".
  
Nesti sentíu, esplicó que lo qu'el mesmu Torre treslladó a el trabayadores la selmana pasada ye que les empreses coles que se calteníen contactos nun yeren cartográfiques específicamente, pero sí grandes empreses que pretendíen desenvolver un departamentu de cartografía o actividá similar. "Lo que se montó ehí ye una empresa de cartografía y en que siga rellacionáu con ello pa siguir teniendo opciones de trabayar".
  
Los trabayadores de Venturo XXI apurrieron en Presidencia del Principáu les 10.000 firmes que recoyeron como amuesa de sofitu a la so situación. "Pidimos una solución", señaló Fernández.