Torna'l populismu a l'Arxentina

El nuevu presidente de l'Arxentina, Rodríguez Saá, promete crear 1.000.000 puestos de trabayu, una midida populista que vien acompañada d'anuncies de que podrán extraditase militares con xuicios pendientes y de que l'Arxentina nun va pagar la delda esterna hasta que tola xente tenga trabayu. El peronismu garra'l control de la nación aplicando les mesmes polítiques. Ente estes espectaculares midíes d'urxencia del nuevu gabinete rescampla la creación d'una moneda nueva dafechu, el "argentino", una moneda que s'anuncia como mui fuerte pero que nun tien traza de dir a aguantar muncho ensin devaluase. Cola llegada del "argentino", fálase nel país tres medios de pagu distintos: los "argentinos", el peso y los Lecop y Patacones, que nun son monedes, sinón lletres del estáu que tan emplegándose pa pagar a los funcionarios. Colos Lecop hai bien de problemes porque en dellos establecimientos -hasta bancos- niéguense a aceptalos.Mientres, una xueza intenta demostrar que los socesos del otru día na Plaza de Mayo taben preparaos, y d'otra parte, van saliendo escándalos de corrupción. El programa de televisión "telenoche investiga" asoleyó esti videu entitulau "Rodriguez SA" nel que dos periodistes fáense pasar per empresarios que quieren instalase na provincia de San Luis, que Rodríguez llevaba gobernando dende hai venti años. D'otra parte, los peronistes anden a carreres por llantase na Casa Rosada. L'ex-presidente Carlos Saul Menem, responsable de muncho de lo que ta pasando agora, y denunciáu por tráficu d'armamentu, quier volver a presentase nel 2003.