Tope de viaxeros nel funicular de Bulnes

13.493 pasaxeros emplegaron esti mes de xunetu'l Funicular de Bulnes, contra los 4.320 que montaron nel tren el pasáu mes de xunu según datos oficiales de la Conseyería de Mediu Ambiente, Ordenación del Territoriu y Infraestructures.

El tren, qu'entamó siendo un serviciu pa los habitantes ye agora una de les mayores atracciones turístiques del conceyu, como se conoz poles cifres d'usuarios, y ello ye que yá nel so primer añu de funcionamientu, nel 2002, tuvo más de 50.000 usuarios que nun vieron mayor estorbisa nos descomanaos precios del remonte, que se punxeron precisamente pa que'l turismu nun tomare al asaltu la instalación. Los menos de 25 vecinos de Bulnes, pa los que se construyó'l funicular, monten nelli de baldre, mientres que los turistes paguen 13,13 pol billete cenciellu d'ida y 16,42 pol d'ida y vuelta, unos precios que baxen de los 5 euros pa los rapacinos, ello pa facer un recorríu de poco más de 2 kilómetros hasta llegar al pueblu de Bulnes, onde munchos los turistes lleven disgustu cuando, al llegar arriba, comprebaben que dende Bulnes nun se ve "El Naranjo de Bulnes" despropósitu toponímicu pol que se conoz al Picu Urriellu, masa montañosa que queda tapada pa la vista dende Bulnes, una aldea bien guapa pero empozada y dende la que nun hai precisamente un panorama de postal.

El funicular de Bulnes, una infraestructura propuesta yá cuando yera presidente del Principáu Sergio Marques, a últimos de los años 90, resultó nel so día resultó bien polémicu, enfrentando a colectivos ecoloxistes con Gobiernu asturianu. Los primeros nun aceptaben que se ficiere una infraestructura tan cara y agresiva nun mediu natural virxe y denunciaben que'l funicular yera un intentu por llevar más turismu a los Picos d'Europa, más qu'un preséu válidu pa la xente de Bulnes.

El funicular, idea del entós conseyeru d'infraestructures Juan José Tielve, que presentó los funiculares de Suiza y Austria como exemplos pal casu asturianu, yera una de les soluciones posibles al aisllamientu de los vecinos de Bulnes, que reclamaben de mano la construcción d'una carretera. El primer executivu del presidente Areces siguió cola obra y al poco d'echar a andar el funicular, nel añu 2002, la Conseyería fizo un concursu pa privatizar la xestión del remonte, nel que s'enfrentaron Fomentu de Construcciones y Contrates y la empresa asturiana ALSA, que resultó ganadora. ALSA xestionaba tamién d'aquella la única llinia d'autocar que s'allegaba a la boca del funicular y dende esti veranu ye concesionaria tamién el serviciu d'autocares a los Llagos dempués de trancase la carretera al tráficu en cumplimientu del Plan Especial de Tresporte a los Picos, neto que l'aparcamientu de Cuadonga nel que los automovilistes han posar el coche pa xubir a los Llagos.