Tomé pide una Direición de Conteníos n’Asturianu y Gallego-asturiano na RTPA

La diputada eleuta por Podemos, Cova Tomé, va defender la creación d’un organismu que mire pol usu del asturianu y gallego-asturiano en RTPA y controle’l modelu llingüísticu. Esti miércoles la Xunta Xeneral constituyó la ponencia pa la ellaboración del tan esperáu mandatu-marcu del ente públicu de comunicación.

“Apostamos por unos medios de comunciación públicos que sían plurales, inclusivos, vertebradores del territoriu y que tean al serviciu de la ciudadanía con unos oxetivos claros”, espresó ayeri Tomé, que punxo’l focu nun asuntu concretu: “Ente otres coses, ye fundamental algamar, d’una vez por toes, la normalización social de les llingües propies, del asturianu y del gallego-asturiano, recoyendo nel artículáu d’esti mandatu marcu les obligaciones al respeuto”.

Por eso demanda la creación de “una Direición de Conteníos n’Asturianu y Gallego-astruriano que mire pol emplegu correutu de les llingües propies, con un modelu llingüísticu afayadizu, y que supervise los conteníos en diches llingües”. Xune Elipe, miembru del so equipu, añadía depués que la RTPA “tien que ponese al serviciu de lo que ye la normalización social de les llingües propies del país, l’asturianu y el gallego-asturiano”.

“Vamos incidir muncho en que se cree esa Direición de Conteníos n’Asturianu y Gallego-asturiano porque al traviés d’ella ye cómo ha establecese cómo s’usen eses llingües, qué modelu llingüísticu ye’l que va tener. Por eso repito que pa nós ye una cuestión fundamental, de país”, añadió.

Aportaciones de profesionales, espertos y grupos parllamentarios

“Entendemos que debería redautase’l borrador contando coles aportaciones de profesionales y espertos nel sector, y de los grupos parllamentarios”, espresó Tomé, que recordó que “vamos con diez años de retrasu” col mandatu-marcu. Por último, defendió “una RTPA ensin inxerencies polítiques, basada na llibertá d’espresión, que sirva como escaparate de l’actividá social asturiana y como ferramienta de normalización llingüística. Entendemos qu’ha desendolcase un mandatu-marcu que recueya toos estos aspeutos y que los recueya y sía d’obligáu cumplimientu independientemente de quién gobierne na comunidá autonóma”.

Pela so parte, Elipe amplió que “al traviés del mandatu-marcu lo que se va facer ye afitar qué modelu de medios públicos de comunicación queremos. Yá lo esplicó mui bien Cova, queremos unos medïos de comunicación onde prime la llibertá d’espresión, ensin nengún tipu d’inxerencia política, que sían los profesionales los que decidan los conteníos; que los informativos respuendan más qu’a los porcentaxes o cupos de los grupos políticos, al interés y criteriu de los propios profesionales”.