Toli Morilla ufre diez conciertos colos cantares de Dylan n'asturianu

|
Toli Morilla ufre diez conciertos colos cantares de Dylan n'asturianu

El cantautor celebra'l décimu aniversariu del so discu con temes del de Minnesota, que visita'l país el día 28 pa tocar en Xixón.

'Diez cantares de Bob Dylan n'asturianu', de Toli Morilla, cumple diez años y qué meyor que celebralo con una xira de diez conciertos qu'arranca esti mes aprovechando tamién que'l músicu estauxunidense tien zarrada una actuación nel Palaciu de Deportes (21 hores). Con un preciu que va dende los 55 euros, en grada, a los 132, nes primeres fileres de pista, va ser la tercer oportunidá de ver a Dylan na ciudá depués de les de 1993 y 1999.

Mientres tanto, los sos munchos siguidores van poder calecer moteres en seis cites con Morilla onde poder disfrutar de temes como 'Huracán, 'Toco les puertes del cielu' o 'Otru café más' na llingua llariega, clásicos de Dylan adaptaos al asturianu con autorización del músicu y la so discográfica. El que va abrir la xira va ser el que tenga llugar esta tarde, a les 19 hores, nel uvieín Clandestino, onde darréu va entamase una folixa.

A esti conciertu van sigui-y, yá en Xixón, el día 25 ún nel Muséu del Pueblu d'Asturies (12 hores) y otru nel Cinema Paradiso (21 hores); el 26 nel Tierra Astur (21.30 hores); el 27 nel Toma 3 (21 hores); y el 28 en La Tabacalera en sesión vermú. Depués d'esa fecha, una vegada pasáu'l conciertu de Dylan, va tocar el 30 en Grau na capiella de Los Dolores (19.30 hores) y el restu en Xixón: el 1 de mayu nel Jazz Café (21.30 hores), el 3 nel Scaletta5 (21 hores) y el 13 de xunu nel Peak & McQueen (20.30 hores).

Contador Estadistiques