Toli Morilla trabaya nel so próximu discu

El cantautor asturianu Toli Morilla ta dndo-y estos díes los últimos retoques al so próximu discu. Asturies.com tuvo nel estudiu con elli pa falar d'esti completu proyectu lliterariu-musical, y del so próximu conciertu'l 22 de xunu nel teatru Campoamor d'Uviéu.

Visitamos a Toli Morilla nos estudios Tutu de Corvera onde ta trabayando pa sacar el cd en directo del espectáculu Nueche d'insomniu, proyectu musical qu'amiesta los cantares del cantautor xixonés con testos de escritores asturianos n'asturianu. Nel estudiu Toli repasa, xunta'l productor Sergio Rodríguez, les grabaciones de los distintos conciertos que se ficieron basaos nel proyectu deNueche d'insomniu, Toli diz que "vamos escoyer lo meyor de les tomes feches nos conciertos que dimos per toa Asturies, amás de da-y dalgún retoque nel estudiu onde veamos que seya necesario, anque, va siguir siendo un discu de directu". Pa poder meter tol conceptu de Nueche d'Insomniu nun discu esta va ser una edición mui completa, "xunta'l cd vamos alcontrar un llibru con tolos testos amás d'una pista de videu con imáxenes de dellos concietos". A lo que nun s'atreve Toli ye adelantar fecha pa presentar esti cd, anque "calculamos que pa últimos del branu, pero lo que si ye seguro ye que va salir cola casa de discos L'Aguañaz".

Con too y con ello, Nueche d'Insomiu ye un proyectu vivu, que casi se reiventa pa cada conciertu. La preba ye la próxima actuación de Toli Morilla, que va ser n'Uviéu el 22 de xunu nel teatru Campoamor "ellí vamos estrenar, como facemos davezu con tolos teatros onde vamos, una escenografía pensada espècificamente pal teatru Campoamor ". Amás, el conciertu va tener un puntu emotivu, "vamos facer un pequeñu homenaxe al desaparecíu Manfer de la Llera, a lo llargo de tol conciertu va haber una butaca vacia alumbrada, y vamos poder sentir la so voz gracies a les grabaciones feches n'otros conciertos onde Manfer participaba".

Comoquiera que ye imposible contar tolo que propón Toli Morilla nuna sola noticia, connvidamos a visitar la so páxina web, onde amás de muncha información sobre elli, tamién podemos lleer un diariu personal onde'l músicu danos la so visión de si mesmu y del mundu.