Toli Morilla presenta n’Uviéu'l so últimu discu

El cantautor asturianu Toli Morilla va presentar güei miércoles nel Teatru Filarmónica d'Uviéu los temes del so nuevu discu "Entropía" un trabayu que salió a la cai el pasáu mes de payares y que va poder sentise en directo, y de baldre, nel Teatru Filarmónica d'Uviéu dende les 20:30 hores dientro del programa "Axenda musical d'Asturies" de la Conseyería de Cultura.

L'artista, que tien comprometida la so presencia nel próximu Conciertu pola Oficialidá del asturianu, que va celebrase'l 28 d'abril, va presentar un trabayu que nos pocos meses que lleva en mercáu recibió un carráu de bones crítiques y el premiu al Meyor Cantar n'Asturianu de la Conseyería de Cultura pol tema "Azul y gris". Concebíu como un mezclienda d'estilos cola que l'autor quixo francer coles etiquetes de cantautor folk p'asomase a otros xéneros, dacuando más comerciales. Con testos d'autores como Xuan Bello, David González, Pablo Texón, Elías Veiga, Pablo R. Medina, Xuan Santori, Marta Mori, Mánfer de la Llera o Luís García Montero, el trabayu contó no musical con collaboraciones de los miembros dl tríu folk DRD o del batería del grupu pop "El sueño de Morfeo" ente otros.

Otra de les propuestes musicales pal día de güei alcuéntrase en Xixón, onde va tocar el Jonathan Kreisberg Trio, formación de jazz col guitarra Jonathan Kreisberg, l'órganu de Gary Versace y la batería de Mark Ferber. Ello va ser nel Centru de Cultura Antiguu Institutu a les 20:00 h.
Más propuestess na nuestra Guía d'Ociu