“Tol mundu debería visitar el Festival Interceltique al menos una vez na vida”, asegura Santianes

“Tamos mui contentos tanto a nivel de públicu como del papel de los artistes asturianos”, destaca Iñaki Santianes a la vuelta d’An Oriant. “Tol mundu debería visitar el Festival Interceltique al menos una vez na vida”, añade’l responsable de la delegación asturiana.

Un añu más, Asturies dexó buelga ente’l públicu bretón y los munchos visitantes d’otros países que tolos años s’averen al Festival Interceltique de Lorient, esti añu dedicáu a Alba, al que pudo acudir unos díes Asturies.com. “Foi mui esitosu. L’asistencia de públicu foi de 750.000 persones y les nueches intercéltiques tuvieron una media de 6.000 persones. A ello hai que sumar la Gran Parade, con 10.000 persones nel campu de fútbol y 70.000 en toda la ciudá”, repasa Santianes. Precisamente, esti domingu l’espectacular desfile con presencia asturiana va poder vese dende les 22.30 hores en diferíu en TPA.

Sobre la presencia asturiana no musical, estaya principal del certame, destacó’l bon sabor de boca que dexó Anabel Santiago n’An Oriant “pola so voz y pola so propuesta”, asina como “la enerxía que descargó Dixebra” nuna xornada fría y lluviósa que restó públicu nel Espace Marine al so conciertu de celebración del so trentenu aniversariu con delles collaboraciones como la de los hermanos Tejedor o la Bagad de Lorient, y l’apuesta nueva d’Hevia con “un espectáculu que va tener percorríu a llargu plazu” na que’l maliayu mira hacia’l Caribe y se fai acompañar por músicos de la rexón. D’igual forma, llamó l’atención de la prensa y públicu’l bon facer tanto de Xeitu como la Banda de Gaites Candás, amás “de la variedá de los sos traxes”.

A ello hai que sumar una victoria nueva nel Trophée Mac Crimmon pour Solistes de Gaita, que tolos años enfrenta a cuatro gaiteros asturianos y gallegos, y que vien dominando Asturies dende’l 2013. Nesta ocasión el trunfu foi pa Jaime Álvarez Fernández, l'intérprete más mozu en ganalu al contar con namái 16 años d'edá. D'esta forma sigue'l camín del so hermanu Álvaro, que resultó vencedor nel 2014 y nel 2015.

Ausencia del chigre d’Asturies

La nota negativa d’esta edición foi l’ausencia del chigre d’Asturies, presente nel festival dende’l 2003 con una propuesta gastronómica y tamién cultural. “Esti añu diéronse unes circunstancies qu’impidieron la instalación del pabellón asturianu, lo que foi una pena, yá que fuimos los primeros en llevalu”, señala Santianes, que cuenta con que se recupere pa la próxima edición “con un proyeutu seriu que vaya muncho más allá de lo gastronómico”.

Asina, la presencia asturiana resumióse a un pequeñu puestín de promoción turística a la entrada de la carpa de Galicia, onde numberosos habituales del festival s’averaben pa pidir sidra, una bébora que trunfa ente’l públicu llocal, despistáu pola ausencia del siempre esitosu chigre asturianu. Sicasí, hebo presentaciones de productos asturianos a lo llargo del certame gracies a la presencia de Trabanco y Crivencar n’An Oriant.

Sobre la implicación del Gobiernu na presencia d’Asturies nun festival que ye un auténticu escaparate mundial pal país y la so cultura, Santianes apunta la bona disposición que reciben siempre dende Cultura y Política Llingüística cuando se reúnen, “anque siempre esperamos recibir un poco más”. Nesi sen, destaca les posibilidaes que tien l’Interceltique tanto no turísticu como no económicu, y anima a les empreses a qu’acudan al festival a promocionase nun espaciu tan importante.

Añu de Cymru

Tres un descansu, el 1 de setiembre va comenzar a preparase lo que va ser la delegación asturiana pa la edición próxima del Interceltique, la cuarentena octava edición, que va tar dedicada a Cymru y va desendolcase ente’l 3 y el 12 d’agostu. “Los dos oxetivos principales va ser tratar d’ameyorar el nivel no musical, dalgo difícil pol nivel tan altu de los artistes asturianos, y la presencia d’un espaciu nuevu d’Asturies, adaptáu a los tiempos nuevos del certame, nos que poder vender a Asturies cola so amplia gama de posibilidaes”.

D’igual forma, el responsable de la delegación asturiana anima a los asturianos y asturianes a averase a la ciudá bretona l’añu qu’entra: “Tol mundu debería visitar el Festival Interceltique al menos una vez na vida”. Razón nun-y falta.

Na semeya, un momentu de l'actuación de Dixebra nel Espace Marine.