Tiren la casona del Señor de Terrero

Desapaez, dempués d'años en ruines, el palaciu del gran cacique decimonónicu del conceyu de Quirós, estravagante personaxe nel que se mecíen la lleenda y la realidá.

Bernardo Álvarez Terrero foi ún de los últimos esponentes del antiguu réxime nos valles del Trubia. Ñacíu en Vil.lamarcel en 1806, Terrero tenía los títulos marqués y de Caballeru de la Orde de la Real Maestranza de Caballería de Zaragoza, ocupando los cargos de vicepresidente, conseyeru, vocal y diputáu nel Conseyo Provincial d'Asturies.

El poder y la riqueza qu'atropó a lo llargo de la so vida, xunta un carácter fuerte y estravagante ficieron d'elli un personaxe de cuentu del que se dicía que cuando diba a Madrid dormía siempre en finques de la so propiedá, y ello ye que'l viaxe a la capital tomába-y al señor de Terrero más d'un día porque nunca nun quixo garrar un tren. Tanta zuna-yos tenía Terrero a los ferrocarriles que, cuando quixeron poner ún pa carretar el carbón de les mines quirosanes hasta Trubia, Don Bernardo, que de mano negóse a dar permisu a que'l tren pasare pelos sos praos, punxo, dempués de muncho negociar, la condición de que'l fumu de la máquina nun se pudiere ver dende la so casa, ello amás d'obligar a poner un vagón onde los sos paisanos pudieren montar de baldre.

Esta anécdota da una idea del calter retardatariu d'esti terrateniente que vio na nueva economía industrial una amenaza a los pegollos de l'autoridá tradicional, y tamién del conceptu paternalista que tenía pa cola xente del conceyu. Preba d'ello son delles de les disposiciones que mandaba nel so testamentu, nel que perdonó deldes y dexó escrito que se repartieren ente los probes del conceyu recibieren 15.000 pesetes en maíz en casu de que viniere mal añu. Les últimes voluntaes del señor de Terrero pagaron tamién una escuela en Villamexín, en conceyu Proaza.

Home relixosu por demás, Terrero llevantó una capiya xunta'l so palaciu y la ilesia de San Vicente de Nimbra, y a la so muerte en 1889 dexó pagues 1.000 mises, a dos pesetes caúna pola so salvación. El retratu del terrateniente complétase cola parte más aldeana de la so personalidá.

Ello ye qu'anque Don Bernardo remanaba perres a espuertes y tenía títulos nobiliarios, nunca nun quixo entrar a les modes de la xente de la so clase. Asina, los pocos retratos que se guarden del Señor de Terrero preséntenlu vistíu col tradicional traxe d'aldeanu, que siempre llevó con toles sos pieces y con montera picona, un fatu que naquel tiempu yá nun se llevaba. Precisamente con esti traxe cuenten que se presentó Don Bernardo a la puya por unos terrenos que la Desamortización de Mendizábal punxere a la venta en Trubia. Diz la historia popular qu'a los demás asistentes a la puya cortóse-yos la risa que traíen con aquel aldeanu cuando Terrero fizo la puya más alta pol terrén y dio la posibilidá de pagalo n'oru, plata o moneda.

La riqueza de Terrero yera descomanada y circulen tamién histories populares sobre como se consiguieron talos caudales, como la que diz que'l padre de Don Bernardo lo atropare d'un galeón, pero lo cierto foi que Terrero morrió nel 1889 ensin dexar descendencia. Los dos testamentos, ún públicu y l'otru secretu, que dexó Don Bernardo, perdonaben deldes, pagaben servicios relixosos y repartíen donaciones y regalos, pero les persones más beneficiaes nel repartu foron los sos mayordomos y asistentes personales, sobremanera Manuel Nieto, quien llevó les más de les propiedaes y bien de les perres que tenía Don Bernardo, polo que se diz que "Don Bernardo nun dexó fíos peró heredó'l nietu".

La histórica casa de Vil.lamarcel, que los sos amos actuales tiraron pol estáu de ruina irrecuperable que presentaba, tenía l'aniciu de la so construcción nel sieglu XVII, con reformes socesives hasta'l sieglu XIX. Va años, cuando yá amenazaba con esfarraplar, esistió un proyectu pa facer d'ella un hotel, pero nunca nun hebo presupuestu pa poder facer la importantísima obra que se requería.
Parte de la ruina del palaciu vieno,amás de pol abandonu, pol espoliu de la muncha xente qu'entraba a la casona abandonada con picos y pales a la gueta de tesoros de calderos de monedes y metales preciosos que se suponíen guardaos nes muries de la casona y que nunca nun apaecieron. Pues ver equí un estoyu de semeyes del palaciu de Terrero