“Tienen que s’avezar a sentir la voz d’Asturies”, afirma Barbón

|
Adrián Barbón Asturies

El presidente Adrián Barbón ta siendo protagonista estos díes en redes sociales pola so postura en defensa de les midíes de respuesta asturianes a la pandemia de COVID-19, lo que xeneró crítiques fuera del país. “Tienen que s’avezar a sentir la voz d’Asturies”, respondió esti miércoles el llavianés.

El so refugu, en plenu estáu d’alarma, a que delles comunidaes, como la de Madrid, pasaran a la ‘normalidá nueva’ saltándose la fase 3, llevó a Barbón a recibir acusaciones de ‘madrileñofobia’ que rápidamente negó, inclusive n’espacios de televisión de medios de comunicación estatal. Nesi momentu llegaron tamién les primeres faltes, como la del vicepresidente de la Comunidad de Madrid, Ignacio Aguado, que llamó “cateto” tanto al presidente asturianu como al gallegu, Alberto Núñez Feijóo, que caltenía una posición asemeyada.

Nes selmanes siguientes, Barbón vieno insistiendo na necesidá de caltener les midíes de seguranza, sobre manera nel usu de la mázcara, interactuando con usuarios y calteniendo una postura firme al respeuto. Ún d’esos mensaxes, sicasí, tornó a dar el saltu a nivel estatal, provocando reaiciones de ciudadanos y políticos de fuera del país.

“Por si queda dalguna dulda, allá vamos: Asturies nun ye la Comunidad de Madrid. N’Asturies ye OBLIGATORIO l’usu de la mázcara, tanto nos espacios zarraos como nes vías públiques y núcleos urbanos. Si vienes a Asturies, ties que cumplir les nueses normes. Gracies”, escribió –en castellanu– énte los incumplimientos que-y llegaron al presidente por parte de turistes y la non obligatoriedá nesi momentu –mañana cambia la norma– del usu de la mázcara nesa autonomía, la única peninsular en non aplicar la midida.

Dos hores depués, viose obligáu a ampliar el so mensaxe apuntando que “nel tuit anterior falo de decisiones polítiques de dos Comunidaes Autónomes y les obligaciones que s’apliquen n’Asturies a toos: ciudadanía asturiana y visitantes. Lo llamativo ye que los que m’ataquen por ello recurren al ‘cateto, pueblerino, quítate la boina’. Pues bien, n’Asturies tamos mui arguyosos de los nuesos pueblos y de ser de pueblu, de la nuesa historia, de la nuesa forma de ser... Y vamos siguir tándolo, anque-y pese a dalguien. Esos mesmos pueblos que tantes persones busque pa relaxar. Y equí recibimos a tol mundu, sía d’ú sía, viva ú viva, con una única condición: que cumpla les nueses normes sanitaries, les que nos ayuden a lluchar contra’l coronavirus. Asturies ye tierra d’acoyida y tamién, arguyosa de la so historia y les sos lluches”.

Magar que la so posición quedaba bien nidia, nun faltaron los ataques, ente ellos la de la diputada na Asamblea de Madrid, Rocío Monasterio. “A @AdrianBarbon le parece que los que vamos a #Asturias desde la Comunidad de Madrid somos menos asturianos, nos trata como a extranjeros ¿luego nos señalará por no hablar bable? El discurso nacionalista excluyente se extiende, daña la convivencia entre españoles #FueraAutonomías”, apuntó la política de VOX.

Respuesta esta mañana

Barbón, na rueda de prensa d’esta mañana, tres una entruga sobre’l programa ‘Reindus’, nel que’l so Gobiernu caltién una postura contraria al estatal, aprovechó pa unviar un mensaxe énte “les diferencies con otres alministraciones qu’estos díes nos fixeron saltar a la fama”. “Nós taremos d’alcuerdu col Gobiernu d’España y con otros gobiernos autonómicos cuando beneficie a Asturies. Cuando non beneficien a Asturies les midíes qu’adopten, abiertamente lo diremos”, principió enantes de “facer una reflexón que me paez interesante: a nivel nacional y a nivel d’otres comunidaes autónomes tienen que s’avezar a sentir la voz d’Asturies. Asturies tien qu'empezar a facese escuchar a nivel nacional y a nivel d’otres comunidaes autónomes. Y ye una de les cuestiones que tengo clarísimes mientres sía presidente”.

Asina, calcó en “fixar siempre la posición política d’Asturies, en defensa de los intereses d’Asturies, con respetu a otres alministraciones. Eso ye lo normal en cualquier estáu, autonómicu nesti casu, pero federalizante”.

Semeya obra d'Armando Álvarez.

Contador Estadistiques