"Tiempos de nublina" retornu lliterariu de Chema'l de Bimeda

"Tiempos de nublina" nueva novela d'esti autor de Cangas del Narcea asitiáu en Madrid, pon l'acción nel pueblu de Castru Furáu, un llugar imaxinariu nel suroccidente d'Asturies nel que la tranquilidá desapaez cola llegada d'un coche qu'anuncia la Guerra. Dende esi intre la vida del pueblu va dir degradándose hasta que'l final de la guerra diga quien son los ganadores y quien son los vencíos. Pente medies, la Guerra impón les sos condiciones a los aldeanos, enforma distintes a les que manda nes ciudaes. Dende la esperiencia de los que tienen que fuxir pa les brañes hasta la llamada a files de los más mozos o los fusilamientos, too ello col únicu contactu col esterior d'una radio na que los rapazos de Castru Furáu sienten la emisión en castellanu de la BBC.

El volume, escritu n'asturianu occidental acordies cola normativa de l'Academia de la Llingua, vien acompañáu d'un CD multimedia nel que pue descargase una versión en castellanu del testu de la obra. D'otra manera "Tiempos de nublina" supón el regresu de Xose María Rodríguez (Bimeda, Cangas del Narcea) a la lliteratura dempués d'un silenciu de más de venti años, cuando'l Conceyu d'Asturies en Madrid perdió la so actividá.

Precisamente'l fallecimientu de Xosé Álvarez "Pin" ún de los fundadores d'aquel garapiellu d'activos asturianistes na capital d'España foi'l guañu dende'l qu'atoñó otra vuelta l'enfotu de munchos de los antiguos componentes d'esta histórica iniciativa cultural asturiana, sobremanera los del occidente asturianu, que va poco participaron munchos d'ellos na primer Xunta d'Escritores n'Asturianu Occidental. El mesmu Xosé maría reconoz la importancia d'aquel alcuentru p'animar a volver a escribir a toa una xeneración, pero apunta qu'elli yá tenía preparáu esti llibru primero d'aquello.