The Booksmovie crea una aplicación pa sentir poesía nel móvil

|
The Booksmovie crea una aplicación pa sentir poesía nel móvil

La fonoteca aragonesa tien nel so fondu documental la voz de poetes recitando les sos creaciones n'asturianu y gallego-asturiano.

Coincidiendo cola cercanía del Día Mundial de la Poesía, que se celebra güei, 21 de marzu, The Booksmovie llanzó una aplicación pa dispositivos móviles con sistemes operativos Android y iOS pa poder sentir poemes en cualquier momentu y en cualquier llugar. “Nesti proyeutu punximos tol alma, sabemos que la poesía pertenez al territoriu de lo íntimo y poques coses son tan personales como’l to smartphone”, apunta María Luisa López direutora de comunicación de la fonoteca.

Los responsables de The Booksmovie tuvieron en payares del 2016 n'Asturies pa grabar a diez autores asturianos pertenecientes a l'Asociación d'Escritores d'Asturies, que collabora nesta iniciativa. Ángeles Carbajal, Inaciu Galán, Berto García, María Esther García, Roberto González-Quevedo, Marisa López Diz, Miguel Rodríguez Monteavaro, Susana Sela y Luis Manuel Suárez recitaron n'asturianu y Moisés Cima en gallego-asturiano, llingua que se presenta na web de la iniciativa dientro de la estaya 'Galego'.

A esta llista incorpórse nel añu últimu Ánxel Álvarez Llano y Chechu García, ampliando la llista d'autores nes nueses llingües propies presentes na fonoteca aragonesa a doce. The Booksmovie, nacida nel 2014, tien anguaño rexistrada la voz de más de 400 autores n'idiomes peninsulares o n'otros como l'árabe exipciu, el serbiu o'l rumanu.

Contador Estadistiques