“Tenemos una responsabilidá histórica y na reforma tolos partíos democráticos han tar a l’altura”, afirma Palacios

|
Rafael Palacios reforma del Estatutu d'Autonomía

El diputáu de Podemos, Rafael Palacios, afaló al Partido Popular (PP) y Ciudadanos “a que participen y aporten” na reforma del Estatutu d’Autonomía y “se sumen al consensu llingüísticu” porque “la llingua nun ye de dereches nin d’izquierdes”. “Tenemos una responsabilidá histórica y tolos partíos democráticos han tar a l’altura, aseguró.

Na sala de prensa de la Xunta Xeneral el de Ciañu fixo una valoración sobre la oficialidá y la reforma del Estatutu d’Autonomía, asegurando que “ye’l momentu de sumar voluntaes con xenerosidá y devolver a la ciudadanía la esperanza, l’optimismu, l’autoestima, l’arguyu, el dinamismu y la capacidá de respuesta” una vegada pasaos los peores momentos de la pandemia. “La nueva normalidá tien que traer la oficialidá. Porque volver al estatus anterior ye volver a un estáu d’anormalidá onde les llingües propies d’Asturies son les úniques del Estáu español que nun son oficiales”, rescampló enantes de calcar en que “ésta nun ye una oportunidá histórica o un momentu hestóricu. Ésta ye una responsabilidá hestórica”.

“Yá pasó’l momentu de les fotografíes, de les declaraciones y los abrazos, y yá llegó’l momentu del diálogu discretu, pero seriu, partiendo evidentemente de lo que tenemos en común. Lo único que ta claro ye que va tar nesa reforma del Estatutu ye la declaración d’oficialidá. Les demás cuestiones tán abiertes”, apuntó.

Por eso llamó al PP y a Ciudadanos –que yá aseguraron que la so llinia colorada pa negociar ye la oficialidá– a que se sumen a un diálogu nel que van participar Podemos, Asturies pela Izquierda (IX-IAS) y Foro xunto col partíu del Gobiernu, la FSA, y nel que se van tratar otros asuntos “que son importantes pal autogobiernu d’Asturies y pa blindar derechos”. “La llingua nun ye de dereches nin d’izquierdes, nin ye propiedá de nengún partíu”, espresó, y sumar a estos dos partíos “al consensu llingüísticu sería sanísimo pa la sociedá asturiana, porque ye un debate yá superáu”.

“La sociedá asturiana col so votu faló con claridá. Los partíos políticos que llevamos la oficialidá nel nuestru programa eleutoral y la defendemos somos mayoría en númberu de diputaos y diputaes y somos mayoría en númberu de votos n’Asturies. Nun se trata d’imponer, nun falamos d’imposiciones, trátase d’escuchar a la sociedá asturiana, que nos ta reclamando que naide n’Asturies seya discrimináu pola llingua que fala. Que n’Asturies se pueda falar castellanu, asturianu y gallego-asturiano con normalidá. Que naide seya obligáu a falar nuna llingua na que nun quiera falar, pero que naide seya discrimináu por falar na so llingua propia”, recordó Palacios.

Semeya obra d'Iván G. Fernández.

Contador Estadistiques