Telefónica presenta n’Asturies “Imagenio”

L'Hotel Reconquista d'Uviéu foi l'escenariu qu'escoyó la directiva de Telefónica pa facer ayeri la presentación pública de "Imagenio" un serviciu nuevu dafechu de TV dixital que la operadora española va ufiertar en pocos díes n'Uviéu y en Xixón y que la empresa cuenta con llevar pa la parte d'Avilés enantes del branu. El serviciu d'Imagenio va funcionar al traviés de la llinia telefónica convencional, a la que namás se precisa acoplar un descodificador especial pa poder acceder a tola so ufierta, que se compón de 39 canales de TV, 15 d'audio y tamién un serviciu de descarga de películes baxo demanda que va funcionar como un videoclub nel que l'espectador pue encargar una película, parar la emisión y volver a entamala en cada momentu que-y apeteza, ello amás d'apurrir aparte conexón a internet pel ADSL en casu de querer el cliente. Imagenio, que se convierte na competencia más directa a los servicios qu'apurre la empresa asturiana Telecable, sal por un preciu base de 12 euros al mes en casu de que'l cliente yá disponga de llinia ADSL. De nun ser asina y querer el cliente namás que'l serviciu de TV, el preciu xube a los 19 euros, siendo preciso amestar a dambos precios los 6 euros mensuales que cuesta l'alquiler del aparatu descodificador. La campaña de llanzamientu ofrez l'alta y la instalación de baldre y cuatro meses coles cuotes rebaxaes al 50%.

El director de Telefónica España Julio Linares acudió en persona a la presentación d'Imagenio n'Asturies, ún de los primeros llugares onde Telefónica echa a andar esta plataforma que tamién ta disponible en ciudaes como Zaragoza, Madrid, Barcelona o Sevilla. Linares llamó l'atención sobre lo avanzao de la tecnoloxía qu'aporta Telefónica con esti serviciu, calificando la plataforma Imagenio como "productu únicu que llega al mercáu con una ufierta insuperable y como un "sistema ensin tope nengún y que vamos seguir meyorando" Ello ye que Telefónica trabaya nel proyectu Imagenio dende l'añu 2.002. Según los representantesde Telefónica, namás en Francia y Bélgica tan desarrollándose tecnoloxíes asemeyaes.

Linares sorrayó que la empresa de telecomunicaciones que representa va invertir n'Asturies cerca de 25 millones d'euros a lo llargo d'esti exerciciu 2005, una cantidá que supón "la mayor inversiónen munchos años" y na que s'incluye tamién la inversión que precisa facer la compañía pa sacar alantre la contrata que ta acabante de ganar pa llevar los servicios de telefonía de l'alministración autonómica y tamién otres estayes como l'espardimientu de la banda ancho o la meyora de les comunicaciones nes zones rurales.
Más información sobre Imagenio