Telefónica pon-y una OPA a Terra Lycos

Ayeri miércoles, el Conseyu d´Alministración de Telefónica dió de pasu el sacar de los mercaos bursátiles a la so filial n´Internet Terra Lycos. Según el comunicáu de Telefónica a la Comisión Nacional del Mercáu de Valores (CNMV) la Ufierta Pública d´Adquisición (OPA) ye sobre´l 100% de la compañía d´Internet con una ufierta de 5,25 euros aición, lo que supón una inversión de 1.726 millones d´euros.

Énte esta anuncia, la CNMV suspendió la cotización de Terra na Bolsa de Madrid cuando los títulos valíen 4,77 euros tres d'una una xuba anual del 19%. La OPA de Telefónica sobre Terra Lycos ye una prima pa los accionistes del 15% sobre´l valor de l´aición nos últimos seis meses, y amás supón una valoración de los recursos propios de Terra Lycos de 2.938 millones d´euros. Según Telefónica, esta OPA ye´l resultáu de la nueva reestructuración del grupu, asina como parte del camín que tien que recorrer la empresa d´Internet na xera d´atopar la rentabilidá. Por exemplu pa Telefónica'l mercáu d´ADSL ye más rentable cola xunión del negociu de Terra. Los aforros nos costes y inversión derivada de la reestructuración son otres causes perimportantes que motivaríen la OPA d'esclusión de la bolsa de Terra Lycos según el comunicáu de Telefónica.



Dempués de que la CNMV llevantare la suspensión de la cotización del valor opáu pola so matriz, Terra Lycos tuvo una xuba del 20, 58% mangándose nos 5,45 euros aición, penriba del preciu de 5,25 euros aición de la OPA de Telefónica. Na sesión d´ayeri los inversores metiéronse nuna llocura especulativa, quiciás de les últimes sobre'l valor, na que se negociaron 151,2 millones d´euros nel valor.



De toles maneres, la OPA ta condicionada a l´adquisición por parte de Telefónica del 75% de Terra Lycos. El preciu de la OPA (5,25 euros aición) ta lloñe de los 11,81 euros aición que pagaron los inversores minoristes de la que Terra salió al mercáu en plenu boom tecnolóxicu. Nel primer díi de cotización Terra pieslló en 37 euros aición, la xuba más espectacular nos mercaos financieros españoles. La llocura inversora del tiempu de la burbuya d´Internet punxo d'aquella a Terra en 140 euros-aición pero güei, el raciociniu del mercáu y l'oportunismu de Telefónica van sacar de los mercaos bursátiles lo que foi un fenómenu especulativu y social nos últimos años.



L'enfadu ente los brokers pol baxu preciu de la OPA yera evidente ayeri pela tarde. En cuantes se dio anuncia de la OPA, los analistes calificáronla de mui negativa pa los accionistes pol baxu preciu de la ufierta. Dellos dicíen que´l preciu real de Terra tenía una prima pal accionista penriba'l 20% per aición, mui lloñe del preciu d'OPA. L´aición de Terra raspió dacuando los 150 euros n'operaciones intradía, polo que´l preciu de 5,25 euros de la ufierta ye indignante según dellos analistes. Con ello rescampla la trampa de que quien fai negociu ye Telefónica mentantu se permite un espoliu a los accionistes que-yos dexaron los sos aforros a unos xestores que nun cumplieron. Y lo peor ye que nun hai alternativa: hai que vende-y a Telefónica les acciones porque va tener el control total de Terra Lycos, y esperar a que la empresa dea dividendos y se revalorice fuera de los mercaos bursátiles nun tien xacíu.



Asinamesmo, pal particular tener aiciones d´una empresa grande que nun cotiza ye como nun tener nada, en cuantes que nun tien representación nin pesu na empresa. Tamién ye improbable qu'otra empresa multinacional entame una contraOPA pa quitá-y Terra a Telefónica. A partir de güei los accionistes tienen que pedir esplicaciones énte un evidente robu por parte de Telefónica. Mercar a preciu d´oru una aición y vese obligáu a vendela perbaxu del valor real nun solo ye perder perres a espuertes, sinon que ye tamién un actu escontra'l conceptu de propiedá. Ensin dulda'l casu de Terra, amás de ser un fenómenu económicu y social, ye un pufu, y más agora que delles empreses d´Internet tan dando anuncia de los sos primeros beneficios. En resume, la OPA de Telefónica nun ye bona noticia nin pa los inversores nin pal prestixu y la tresparencia que se-yos suponen a los mercaos bursátiles.