Telefónica peslló l’añu con 350 puntos de serviciu Wi-Fi

Telefónica peslló l'añu 2004 con 350 puntos instalaos en tol estáu qu'apurren serviciu de conexón Wi-Fi, ello ye, conexón a internet ensin cables al traviés d'un dispositivu específicu instaláu nel ordenador o al traviés d'axendes PDA y otros preseos informáticos adaptaos a esta tecnoloxía, que tien más de 20.000 usuarios n'España

Asturies tien dalgo menos del 10% del total de puntos WI-Fi de Telefónica del Estáu, en concreto 22, mientres que l'operador Vodafone tien puestos otros 2 más y la mesma Telefónica tien preparaos otros 10 que tan en procesu d'instalación. Sicasí, toos estos puntos de conexón tan asitiaos en locales particulares, el 90% d'ellos n'hoteles y el restu en restoranes y otros negocios d'hostelería. Asina, a diferencia de lo que pasa n'otros llugares, onde edificios d'usu públicu como aeropuertos o palacios de congresos cuenten con accesu Wi-Fi, n'Asturies nun disponen d'estes conexones edificios y instalaciones como l'Auditoriu Príncipe Felipe d'Uviéu, la Feria de Muestres de Xixón o l'aeropuertu de Ranón, ello cuando munchos aeropuertos de la rede de la Empresa Nacional d'Aeropuertos AENA yá disponen de sales con Wi-fi.