Tejedor y Ciquitrinos, actuaciones destacaes nes fiestes de los Mártires

El conceyu de Mieres presentó ayeri'l programa de les fiestes de los Mártires de Valdecuna, que van celebrase del 26 al 28 de setiembre.

La conceyala de Festeyos y Turismu del Conceyu de Mieres, Isabel Sánchez, y l'asociación de Vecinos Llanduelu d'Insierto, presentaron ayeri na casa conceyu de Mieres el programa de Los Mártires 2005, fiesta d'Interés Turísticu Nacional dende l'añu 1969 y qu'abre, cola peregrinación a San Cosme y San Damián, nel valle de Cuna y cenera, el programa de fiestes de la seronda nes cuenques.

La fiesta entama n'Insierto'l llunes 26 cola música del grupu folklóricu L`Artusu y col pregón, que va tar a cargu del escritor mierense y espertu en cultura tradicional asturiana Ismael González Arias. El martes 27 ye'l día de la peregrinación, pero la protagonista va ser la música, cola celebración del X Festival de Tonada Voces de Mieres, qu'entama a les 5 de la tarde, viniendo darréu d'ello l'Espectáculu "Torner" que va representase a les 6 de la tarde y que consiste nun conciertu con 30 cantares escoyíos del repertoriu líricu Asturianu recoyíos pol famosu musicólogu. Anabel Santiago, Alberto Varrillas, María Álvarez, Michael Lee Wolfe y Manuel Cordero son los encargaos de representar esti musical que va valir pa facer tiempu hasta qu'entame'l VIII Festival Folk, qu'echa a andar a les 7,15 de la tarde coles actuaciones de Los Citriquinos en primer llugar y dempués la de Tejedor.

El miércoles 28, que se conoz tradicionalmente como'l "día de Los Martirinos" va pesllar la fiesta con xuegos infantiles, romería cola orquesta "Nueva Banda" y la competición local de tiru cuerda, que cuenta cola particularidá de que se celebra a les 11 de la nueche.