Tejedor nun apara esti branu

El grupu de los hermanos Tejedor nun tien proyectu discográficu pel momentu, pero ello nun va quitar pa que tengan un branu bien movíu nesti añu 2005. La so xira de branu entamó oficialmente'l pasáu 20 de Mayu en Turón y sigue esti domingu 5 de xunu, que van tocar na Fiesta del Quesu d'Amieva. D'ehí en p'alantre'l grupu tien bien de feches contrataes hasta llegar hasta'l mes d'avientu, rescamplando la gran cantidá de salíes fuera d'Asturies que van facer. Una de les más interesantes va ser la que faigan al William Kennedy Piping Festival que se celebra tolos años n'Armagh (Irlanda). Les fiestes patronales de Zamora, el Festival Cornamusam de Olot en Cataluña, Fuengirola, Cantabria, Galicia, Llanes y Corvera van ser otros de los llugares del calandariu de la banda.

Aparte de l'actividá normal del grupu, José Manuel Tejedor va participar nel mes de xunetu nos cursos qu'organiza en Xixón la "Fundación Magistralia" creada por Emilio Aragón, poniendo delles clases maxistrales sobre'l so instrumentu, la gaita. Tejedor va participar tamién na estrena n'Asturies de la obra sinfónica Keltiké, escrita por Ramón Prada.