Tarañu presentó'l so xeitu

La recoyida selectivo de residuos medró en Xixón nel últimu exerciciu ente un 11 por cientu nel casu del papel y un 29% nel casu de los envases, acordies colos datos del balance públicu fechu pol Conceyu.

La ciudá más grande del país, con cerca de 270.000 habitantes, ye tamién una de les que más reciclen. 2.080 contenedores espardíos pel conceyu recoyeron l’añu pasáu un total 7.000 tonelaes de papel y cartón, 2.700 tonelaes de vidriu y 1.500 d’envases. Xunta estos datos, qu’espeyen una xuba del reciclaxe, Xixón xeneró nel 2.003 un total de 135.000 tonelaes de residuos sólidos urbanos, una cantidá asemeyada a la del 2.002, cuando se pañaron na Villa de Xovellanos un total de 131.000 tonelaes de basura. Con ello, cada xixonés crea 980 gramos de basura al día por términu mediu.

Con estos datos, el 2.003 preséntase como un añu nel que les tases de reciclaxe esperimentaron n’Asturies un reblagu positivu enforma. Uviéu, por poner un casu, pasó de ser ún de los conceyos que menos reciclaben a presentar unes tases altísimes pa la media asturiana. Asina, cada uviéin mandó nel 2.003 un total de 7,32 kilos d’envases a reciclar contra los 2,51 del 2.002, según datos oficiales de Cogersa.



Los envases son, como vien pasando tolos años, la rama onde más xuben les tases de reciclaxe pasando nel cómputu total d’Asturies la recoyida de los contenedores mariellos de 3.348 tonelaes a más de 5.000, pero ello nun quier dicir qu’allancare la recuperación de papel y de cascos de vidriu. Si nel 2002 Asturies mandó a reciclar 18.800 tonelaes de papel, nel 2003 pasóse a más de 22.000, mientres que’l vidriu pasó de 6.380 tonelaes a más de 7.600.