Tarañu presenta'l so discu nun conciertu especial

Anque yá va dellos meses que'l so discu ta en mercáu, Tarañu entovía nun ficieren hasta agora una presentación pública del mesmu. El grupu quier cumplir esi espediente nun conciertu especial que va facese esti vienres en Morea d'Ayer y pal que van contar con dellos convidaos especiales

El Teatru "Cine Carmen" de Morea d'Ayer va ser dende les 8 y cuartu de la tarde d'esti vienres día 14 l'escenariu de la presentación de "Al xeitu de nenyuri" un acontecimientu pal que la entrada ye de baldre y nel que, amás de los miembros del grupu, cuéntase coles collaboraciones de prestixosos intérpretes de la música tradicional y folk asturiana como Xuan Nel Expósito de Felpeyu col curdión, Merce Santos de La Bandina, a la zanfoña o Alberto Ablanedo del grupu Bron al bouzouki ente otros. Amás Xosé Antón Fernández "Ambás", conocíu investigador del folklore asturianu y miembru del grupu N'Arba, va interpretar delles pieces del repertoriu tradicional vocal del conceyu d'Ayer.


Tarañu nació nel añu 2002 cola intención d'amestase a la corriente del nomáu folk acústico que cuenta n'Asturies con una escena de calidá reconocío, afitando la so propuesta dende la base de la música tradicional y les composiciones propies inspiraes nella, con una fuerte sección rítmica de cuerda y percusión. El grupu, más que la reinterpretación esplícita de la tradición busca la recreación del espíritu de lo tradicional baxo un puntu de vista personal y contemporaneu. Esti "xeitu de nenyuri" que supón la so estrena discográfica tien trece temes qu'espeyen esta filosofía musical, con xotes, saltones y muñeires ente otres pieces. José Luis Díaz (bouzouki), Germán Álvarez (gaita y bombarda), Gema Palacio (vigulín y voz), Elena Díaz (bodhran y percusión), Daniel Oubel (guitarra) y Daniel Álvarez (xiblata) son los componente de Tarañu, que yá cuenten con dos nominaciones pa los Premios de la Música de la SGAE nes estayes de meyor discu folk y meyor canción n'asturianu.