Taramundi dedíca-y una selmana al fierro

El conceyu de Taramundi va celebrar del 6 al 11 d'esti mes d'avientu la so primer Selmana del Fierro y la Cuchillería Tradicional, con un programa d'actividaes que va contar con conferencies, demostraciones de los llabores del fierro y otres actividades culturales, too ello coincidiendo cola ponte de la Constitución.

La declaración de Taramundi como "Zona d'interés artesanal" pol Gobiernu asturianu supón un incentivu a la recuperación de la tradición d'oficios artesanos nesti conceyu artesanal, que caltien delles tradiciones vives como les de los telares, el miel o, sobremanera, el llabor del fierro en navayes y cuchiellos de gran sonadía. Ye por ello que la Muestra d'oficios tradicionales garra especial puxu nesta IV edición que va contar cola presencia d'artesanos d'Asturies, Galicia, Cantabria, Aragón, Cataluña y Albacete. Les actividaes entamen el martes 6 cola recepción de Rafael Utrilla, autor del llibru Acero en las venas , como fíu del conceyu de Taramundi, mientres que'l xueves van facese delles ponencies sobre los usos actuales del fierro. El mazu d'Aguillón va ser onde se faiga esi día pela tarde una demostración del llabor de forxa con mayestros ferreiros, mientres que'l sábadu día 10 Taramundi va acoyer el primer alcuentru de coleccionistes del cuchiellu tradicional de Taramundi, pesllando les actividaes el domingu 11 con una xornada intensiva nes instalaciones del conxuntu etnográficu d'Os Teixois.