"Tamos dispuestos a tou siempre qu'haya alcuerdu de los cuatro", apunta Barbón

"Mientres hai vida hai esperanza", espresa'l presidente sobre la negociación de la reforma estatutaria pa incluyir la oficialidá.

Adrián Barbón frayó'l so silenciu sobre'l bloquéu d'esti procesu que se confirmó'l llunes depués de la tercer xunta celebrada esti mes pa encaralu. "Lo qu'hai seguro son 26 votos, necesítense 27 y el 27 punxo unes condiciones", resumió'l socialista, qu'apuntó qu'él foi'l primeru n'aceptar los trés quintos y que "sobre la fiscalidá la postura del PSOE y del Gobiernu d'Asturies siempre foi clara: tamos dispuestos a tou, a alcordar lo que sía, siempre y cuando sía frutu del alcuerdu de los cuatro partíos que quieren sumar la oficialidá".

El presidente llamentó que de "esta frustración la que sal ganando ye la ultraderecha, porque'l PP, que yá bloquió la reforma del Estatutu nel añu 2008 torna a facelo, pero non a impulsu propiu, sinón a remolque de la ultraderecha. Y eso sí m'esmolez, porque hai munchísimos votantes moderaos del PP que nun entienden qu'Asturies sía una autonomía de Primera, que ye los que reivindica'l Gobiernu d'Asturies".

Na imaxe, Barbón atiende a los medios en Sama, onde acudió al actu de colocación de la primer piedra del Palaciu de Xusticia de Llangréu.