Surden les primeres crítiques a la propuesta de llei d'Esquerra

L'asociación Xeira, l'Academia de la Llingua Asturiana y Izquierda
Asturiana son los primeros en salir criticando la propuesta de llei que
pide la oficialización del gallegu nel estremu occidental
d'Asturies.



En declaraciones a Asturies.com, Xeira quier dexar claro que "nun
nos paez preocupante dende'l puntu de vista llegal, yá que nel propiu
documentu dizse que toles actuaciones previstes fadránse siempre
respetando les competencies de cada autonomía". Con too y con ello,
Xeira ye mui crítica yá que "llueve sobre moyao, y vuelve a
machacar más sobre un tema, y yá tamos fartos de que vengan a
"salvanos" cada vez dende más llonxe". La iniciativa
d'Esquerra dende'l colectivu de defensa del gallego-asturianu
entiéndenla como "una manera de xustificar la so postura na zona
oriental aragonesa que consideren de fala catalana, amás d'amosar nel
partíu catalán un desconocimientu grande de la situación
llingüística y social d'asturies".



L'Academia de la Llingua ye tamién mui crítica cola
propuesta, Xosé Antón González Riaño declaró
a Asturies.com que "ye una inxerencia más de les que sufre
Asturies, y que se faciliten pola non reconocencia de la oficialidá del
asturianu y del gallego-asturiano nel so ámbitu". Poro, l'Academia
de la LLingua reclama "un posicionamientu claro del gobiernu asturianu al
más altu nivel". Ye dicir, l'Academia pide que'l presidente
Álvarez Areces y la conseyera de cultura "afiten y defendan
públicamente l' asturianidá de tol occidente asturianu, y
reconozan defendan la modalidá llingüística propia de la
zona del Navia-Eo, y del asturianu como única manera de responder a
estes inxerencia que yá son intolerables".



Pela so parte Izquierda Asturiana (IAS) espublizó un
comunicáu onde califica d'intolerable la propuesta d'Esquerra. El so
portavoz Inaciu Llope considera que , anque la llei puede tener dalgunos
aspectos mui positivos, "ye una inxerencia esterna en política
llingüística". Asina dende
IAS consideren qu'esto ye otra vegada un "intentu de teledirixir una
política llingüística n'Asturies dende intereses ayenos a
los nuesos", y qu'esti fechu dase pola mor de la "pasividá, la
permisividá y la dexación de funciones d'un Gobiernu Asturianu
que nun ye curiar el nuesu patrimoniu llingüísticu y
cultural". Llope tamién afirma nel comunicáu que "ye
irónico, anque previsible, qu'un partíu como ERC, qu'hai poco
más d'un añu pidía'l votu a los asturianos y asturianes pa
una coalición que diba defender la nuesa identidá n'Europa,
presente agora una propuesta qu'atenta radicalmente contra los intereses
xenerales d'Asturies".