Sufre’l líder pa ganar al colista

Los qu'acudieron ayeri al Tartiere amás de pasar muncho frío tuvieron la ocasión de contemplar los peores primeros 45 minutos del Uviéu dende que baxó a tercera. L'equipu azul sufrió un atascu xeneral en toles llinies y solo intentó marcar per aciu d'aiciones individuales que siempre supieron parar lo xugadores del Andés. Una primer parte na que solo se vireon dos ocasiones, una pa cada equipu ya increiblemente fallaes por Entrialgo y Darío a puerta vacía, hasta que yá na prollongación llegó'l gol del Andés qu'al menos sirvió pa que'l Tartiere s'enllenare de pitos y pa que los munchos aficionaos del Andés qu'ayeri acompangaron al so equipu pudieren disfrutar d'una caña al descansu ganando a tou un R. Uviéu nel Tartiere.

L'Uviéu salió más motiváu na segunda parte, Rivas cambió l'esquema del equipu y acertó nos cambios, primero Cervero y Michu y dempués Aldeondo que vino a ser el revulsivu definitivu. Xunto a esti aciertu nos cambios d'esquema y xugadores y la mayor calidá del equipu azul, hai de destacar como decisivu l'aspectu físicu d'un equipu que ye profesional y qu'a estes altures del campeonatu tien que notase en forma. 6 minutos-y sirvieron al Uviéu pa plasmar esta superioridá técnica y física en tres goles que yá decidíen el partíu. Entamó Jon Carrera con un gran gol pela escuadra al pegá-y un gran trallazu a la pelota dende fuera del área nun rechace d'una falta. A los dos minutos d'esti gol, foi Darío'l que recibió un gran pase de Xandru y batió a Piñera con una espectacular vaselina que ponía'l 2-1 nel marcador. El partíu yá taba rotu pero ésto acabó de certificalo Michu col tercer tantu nel minutu 63. La superioridá azulina yera yá absoluta. D'equí al final delles ocasiones de Darío y Cervero que pudieron facer más clara la victoria, pero Piñera salvó los sos remates, anque nada nun pudo facer ante'l remate de Cervero que zarró la cuenta nel minutu 88.

Dos avisos de los qu'hai de sacar conclusiones: ún que vien del resultáu del primer tiempu y otru que vien de los 3000 espectadores menos qu'ayeri acudieron al Tartiere a una hora que nun ye la de siempre, que tome nota quien tenga de facelo.