Subvención pal estudiu del osu

El Ministeriu de Mediu Ambiente concedió-y ayeri una subvención de 74.054 euros a la Fundación Osu Pardu pa la realización d'un proyectu sobre l'osu. El proyectu a llevar alantre pola fundación consiste en garantizar la conexón ente los núcleos reproductores del osu pardu nel corredor de L.leitariegos, ente Asturies y Lleón.

Según los últimos censos fechos pola Fundación, más de cien igüen la población d'osu pardu nel occidente d'Asturies va camín de recuperase, presentando tamién esta colonia d'osos del occidente asturianu, que tien el noyu más importante na reserva de Muniel.los, un índiz de reproducción mui altu, con una tasa más o menos estable del +7,5% de crecimientu añal dende mediaos de los años 90, cuando entornó la gravísima crisis demográfica que tuvo a piques d'acabar cola especie a últimos de la década de los 80.

La incomunicación ente los grupos d'osos d'una parte y otra de la cordal que lleva a una situación d'endogamia ye ún de los problemes pa la sobrevivencia de la especie, lo mesmo que la gran cantidá d'infraestructures que van tarazar la cordelera cantábrica en forma de carreteres, linies d'alta tensión o estaciones d'esquí y que suponen un problema qu'ataca directamente l'habitat de la especie, polo que los técnicos de la Fundación Osu piden midíes qu'aselen l'efectu d'estes acciones sobre'l mediu. Precisamente la incomunicación ente los distintos grupos d'osos ye'l problema qu'amenaza más gravemenet la sobrevivencia del otru grupu d'osos que queden n'Asturies, l'oriental, qu'igüen cerca de 30 animales.