Suburbia Ediciones coedita xunto al Gobiernu’l poemariu ‘Un ciertu desorde’, de Gutiérrez Morán

Los llectores asturianos yá pueden disfrutar del Premiu Xuan María Acebal de Poesía 2011. Suburbia Ediciones ta acabante d’editar, xunto col Gobiernu, la obra de Xosé Ánxelu Gutiérrez Morán, ‘Un ciertu desorde’.

“Poesía de lo cotidiano, pero tamién de la memoria; del paisaxe, pero tamién del paisanaxe; d'oxetos y naturaleces muertes, pero tamién de voces y xestos, ‘Un ciertu desorde’ mira oblicuo pa les esquives perspectives con que la memoria nos desaveza a lo habitual”, espliquen dende Suburbia Ediciones sobre la obra que-y sirvió al autor avilesín pa ganar la decimosesta edición d’esti reconocíu gallardón. Nel actu d' entrega de los premios lliterarios del del país, celebráu’l 20 d’avientu nel Palaciu d’Inclán Leiguarda d’Uviéu, Gutiérrez Morán dedicó’l premiu a la so güela y destacó la importancia que tienen los mayores na tresmisión xeneracional del idioma.

Xosé Anxelu Gutiérrez Morán (Avilés, 1969) ye doctor en Bioloxía y investigador del Instituto Español de Oceanografía. Escribió los poemarios ‘Países’ (2005; Premiu Teodoro Cuesta, ex aequo) y ‘Diversa memoria’ (2010; Premiu Teodoro Cuesta). ‘Un cierto desorde’ yá ta a la venta a un preciu de 10 euros.