SUATEA y CCOO denuncien un taragañazu na enseñanza pública n’Asturies

Los sindicatos d'enseñanza SUATEA y CCOO tan qu'echen fumu ente la posibilidá de que la Conseyería d'Educación proceda al pieslle de cerca de 250 unidaes d'alumnáu pal cursu 2005-2006.

SUATEA, que perita en 252 el númberu d'aules afectaes pol taragañazu -CCOO dexa la cifra en 238 unidaes- diz que l'alministración lleva tiempu esmuciendo datos sobre les sos intenciones pal cursu 2005-2006, y denuncia que, cola documentación que ta acabante d'apurrir el departamentu que dirixe Iglesias Riopedre, supón ún pasu más nel desmantelamientu de de la enseñanza pública n'Asturies.


El documentu en que se tienen les previsiones de los sindicatos ye'l qu'espeya la propuesta d'unidaes cola que trabaya la conseyería. A falta de conocese los Documentos de Centru,que permiten conocer la situación en cada escuela y institutu, el sindicatu SUATEA diz que solamente n'ESO la Conseyería pretende trancar 83 grupos y otros 83 más en Bachilleratu, mientres que na Formación profesional el pieslle pue afectar a 24 unidaes. La enseñanza infantil ye tamién una de les grandes afectaes, con 74 unidaes que desapaeceríen teóricamente pal añu qu'entra, ello a falta de conocese la propuesta pa los Centros Rurales de primaria, nos que la mengua de población y alumnáu faen albidrar posibles recortes.

Por conceyos y fasteres, SUATEA albidra un panorama especialmente escuru pa la parte d'Avilés, onde se retiraríen 23 unidaes n'ESO y 16 en bachilleratu -anque se crearía una nueva- mientres qu'Uviéu y los conceyos de la so redolada perderíen 32 unidaes d'ESO contra 8 nueves que se crearíen y 28 en bachilleratu contra trés nueves. Xixón perdería 7 unidaes d'ESO y 13 en Bachilleratu, y peles ales, l'oriente quedaría con 11 unidaes menos d'ESO y 7 de secundaria, asocediendo otru tanto nel occidente. En paralelo a estos pieslles, SUATEA denuncia'l que se caltengan conciertos educativos con empreses particulares y incluso que se lleve la concertación a etapes educatives nun obligatories. Pela so parte CCOO perita nunos 500 los puestos de trabayu que peligren colos pieslles de grupos previstos.