SUATEA ve "más disposición que fechos" na reforma de la Llei d'Enseñanza

Beatriz Quirós, representante de SUATEA y responsable de política educativa de la
Confederación de STEs-intersindical na que s'enxerta'l sindicatu asturianu d'enseñanza faló con Asturies.com sobre la reunión que tuvo ayeri'l Conseyu Escolar del Estáu en Madrid cola Ministra d'Educación Carmen Calvo y na que'l Gobiernu presentó les llinies xenerales poles que va mandase la reforma de la Llei d'Educación.




La representante de la segunda confederación sindical del estáu destacó qu'entovía nun tien estudiáu'l documentu completu de propuesta de reforma que-yos apurrió ayeri la ministra, pero dio anuncia de la esistencia de dellos aspectos que-y abulten positivos, mientres qu'otros nun-y lo paecieron tanto, anque agradeció la "voluntá de diálogu" que paez tener el gobiernu sobre la cuestión.

La crítica más fuerte de la sindicalista asturiana va a la defensa de la educación concertada que se fai na propuesta de reforma. Beatriz Quirós diz que nel documentu que se-yos presentó ayeri la "prioridá de la escuela pública queda arrequexada y caltiénse la concertación hasta n'educación infantil". D'otra manera, la enseñanza de la relixón, otru de los caballos de batalla de la reforma educativa, quedaría "como taba enantes d'entrar el PP" una solución que nun-y presta a la formación que representa Quirós y que la Ministra defendió d'alcuerdu a la esistencia del concordatu cola Santa Sede, qu'obliga a la presencia de la relixón nel sistema educativu. De cualquier manera, la titular de la cartera d'enseñanza comprometióse a formular una consulta al Conseyu d'Estáu sobre la posible retirada dafechu de la materia.

En cuantes a la evaluación, una de les novedaes qu'aporta la propuesta de reforma ye la desapaición de la reválida n'acabando los cursos de bachilleratu, anque ello va traer la vuelta de la selectividá o preba d'accesu pa quien quiera entrar a la universidá

Sicasí, Beatriz Quirós aprecia delles meyores en cuestiones que-y preocupaben muncho a SUATEA, casu de los itinerarios de la Llei de Calidá, que nun desapaecen pero nos que s'amiesten midíes diferenciaes de refuerzu pa escolinos con necesidaes y nos que s'abre, al entender de Quirós, un periodu "d'esperimentación" nel que van poder probase soluciones que funcionen n'otros países y nel que los centros van tener más independencia.

Precisamente un aspectu qu'afectaba a la independencia de la comunidá educativa, como ye'l de la elección de los directores de les escueles, va camudar tamién. Una de les quexes más fuertes de SUATEA yera que cola LOCE l'alministración ponía "a deu" a los directores de centru, mientres que, polo que se sabe hasta agora de la propuesta de reforma, la comunidá escolar va recuperar dalgo -que non too- de capacidá de decisión sobre estos nomamientos.

La reforma de la Llei d'educación va dir rápida. Na reunión d'ayeri, la ministra Carmen Calvo esplicó que va dase de mano un plazu d'unos trés meses pa que tolos sectores interesaos debatan les reformes propuestes y aporten les sos suxerencies, mientres que la previsión ministerial ye que la entrada en vigor definitiva de la llei se produza d'equí a la vuelta de dos años