SUATEA tresllada a Suárez la necesidá de cumplir cola Llei d’Usu y de crear la especialidá docente

|
Conceyu Carmen Suárez Suárez y SUATEA

La conseyera d’Educación aconceyó esti llunes con representantes de SUATEA, qu’entregaron a Carmen Suárez Suárez un informe de 27 páxines con propuestes pa esti escursu. El sindicatu educativu demandó-y avanzar hacia la oficialidá ufiertando la Llingua Asturiana en tolos niveles y la creación de la especialidá docente.

La xunta, de dos hores de llargor, trató numberosos temes “nun clima que pue calificase de cordial”, apunten dende’l Sindicatu Unitariu y Autónomu de Trabayadores de la Enseñanza d’Asturies (SUATEA). La problemática de la llingua asturiana y el gallego-asturiana tuvo enriba la mesa, treslladando a la conseyera la necesidá de “trabayar pola oficialidá y avanzar escontra d’ella cumpliendo puramente la Llei d'Usu, qu'obliga a ufiertales en tolos niveles educativos, y tamién la creación de la especialidá”.

Les ratios d'alumnáu, les xubilaciones, los permisos y llicencies –permisu por asuntos particulares o ‘moscosos’ y el permisu parcialmente retribuyíu o ‘añu sabáticu’– y la presentación de propuestes sobre igualdá, coeducación y sobre derechos llaborales rellacionaos cola la maternidá y el permisu d’amantamientu tamién salieron a alderique. Ente los apartaos consideraos relevantes por SUATEA tuvieron les condiciones llaborales del profesoráu.

“En toes estes cuestiones creemos que primó'l diálogu francu y fluyíu en caúna de les partes. Observemos interés y cierta receptividá énte delles de les nueses propuestes, anque, a la vez, tresmitiósenos que cualesquier posible cambéu ta suxetu siempres a les llendes marcaes poles posibilidaes presupuestaries. En SUATEA pensamos qu'hai que facer un esfuerzu por empezar a romper cola inercia de cursos anteriores, marcaos polos retayos y el retrocesu nes condiciones llaborales del profesoráu”, espresaron.

Na semeya, el xefe de gabinete de la Conseyería d'Educación, Pedro Pablo Rey; la conseyera d'Educación, Suárez; y los integrantes del secretariáu de SUATEA, Isabel González López, Mariam Moreno Llaneza, y Xosé Luís Colodrón Ardura.

Contador Estadistiques