SUATEA reclama dignidá pa los alumnos de les escueles rurales

Les declaraciones feches pola conseyera Ana González sobre la “singularidá” de les escueles rurales na so visita a Ibias nun prestó a SUATEA. El sindicatu educativu denuncia la situación d’estos centros y reclama dignidá pa los alumnos.

González tuvo presente nel occidente del país ayeri pa inaugurar el proyeutu ‘Ibias, lenguas y culturas 2013’ nel colexu Aurelio Menéndez. En Santantolín anunció que mantendrá la ratio, qu’apuntó que yera de les más baxes del Estáu, y señaló que nun se ta zarrando xunidá nenguna que cuente con alumáu. “Tenemos una ratio de 4 alumnos y a partir d’ahí alcanzamos una ratio pa les xunidaes mestes de 16, mientres que nes non mestes, esto ye, nes escueles que nun son d’ámbitu rural, ta en 25”, apuntó, pa, depués dicir que’l Gobiernu ta faciendo “un esfuerciu”. Amás, destacó que pa caltener una ratio tan baxa na zona rural la so conseyería utiliza’l multigrau o aules mestes.

El Sindicatu Unitariu y Autónomu de Trabayadores de la Enseñanza d’Asturies (SUATEA), tres conocer estes declaraciones, quixo recordar a la conseyera que nestos momentos hai aules na zona interior del occidente del país “con neños y neñes con edaes que van dende 3 a 12 años –de 3 años d’Infantil a sestu de Primaria–, toos ellos atendíos pol mesmu profesor o profesora”, dalgo que consideren que “nun ye calidá” al entender que los más mayores tienen que tar sintiendo les esplicaciones a los pequeños, causa ensin dulda de distracción. “Imaxínese que vusté tien que redautar un informe mientres siente de fondu esplicaciones que se dan a neños d’Infantil; pues ésta ye la realidá de munches escueles rurales”, afirmen.

Sobre les ratios baxes, apunten que González omite que se deben pola baxa natalidá d’Asturies y, más en concreto, nel occidente. “¿Qué facemos colos poquísimos neños d’esta zona? Sacamos la calculadora, aplicamos las ratios al pie de la lletra, facemos númberos y aplicamos el too val para que salga mas baratu”, señalen pa depués destacar que “lo baratu a veces sal caru”. “Dende SUATEA esiximos a la conseyera d’Educación que tenga en cuenta la ‘singularidá’ de la zona del occidente asturianu, que dexe a un llau la calculadora y que caltenga la Escuela Rural y al so alumnáu nunes condiciones dignas que nun sían determinaes namái por criterios numbéricos”, fina’l comunicáu.

La importancia de daprender llingües

Na inauguración del proyeutu ‘Ibias, lenguas y culturas 2013’, González destacó la importancia de daprender llingües, nun sólo como una ferramienta pa la comunicación, sinón como un instrumento para reflexar la percepción del mundu. “La llingua ye un factor crucial pa entender tanto aquello que nos arrodia, como a nós mesmos. Y namái dende’l conocimientu de lo propiu y el respetu a lo diferente, pue progresase na consolidación d’una convivencia llibre y democrática”, señaló la conseyera d’Educación, Cultural y Deporte, que la selmana pasada confirmó a los profesores de Llingua Asturiana y Gallego-asturiano nun tien intención de potenciar l’asignatura cola entrada de la reforma educativa que prepara’l ministru Wert.